Entidat Públiko Boneiru ta organisá riba djasabra 22 di mart 2025 e di dos seshon di “Papia ku Pueblo”. E intenshon di e enkuentro aki ta pa konsultá ku nos komunidat, e NGO-nan i otronan enbolbí tokante dunamentu di kontenido na e “Agènda di Akshon” rònt di prosesamentu di pasado di sklabitut.
Komishon “Konmemorashon, Impakto i Futuro”
Den kuadro di e diskulpa ku Hulanda a ofresé pa su ròl komo kolonisadó durante e periodo di sklabitut, entidat públiko Boneiru a instituí e komishon “Konmemorashon, Impakto i Futuro”. E komishon akí ta konsistí di seis miembro for di diferente sektor:
- Alfrida Martis (representante atministrativo)
- Steven Cicilia
- Marcelino Mauricio
- Angèle Cecilia
- Jennifer Pocornie-Martis
- Maideline Martijn-Hooi (presidente)
E komishon tin komo tarea pa identifiká inisiativanan i proyektonan ku ta kontribuí na prosesamentu di e konsekuensianan di sklabitut.
Fondo pa prosesamentu di pasado di sklabitut
Hulanda a pone un fondo di 33 mion euro disponibel, repartí atraves di e seis islanan karibense den Reino. E fondo ta destina pa proyektonan ku ta sostené desendientenan di personanan hasí katibu ku andamentu ku e impakto di pasado di sklabitut.
Pa Boneiru e komishon di Konmemorashon, Impakto i Futuro ta enfoká riba tres tema importante:
- Fortifikashon di infrastruktura di museo
- Digitalisashon i aksesibilidat di archivo
- Rekonosementu di Boneiru su historia i kultura
Banda di esaki Ministerio di Asuntunan Interno i Relashonnan den Reino (BZK) ta finansiá un monumentu di nòmber, riba kua lo menshoná nòmber di personanan hasí katibu. E monumentu akí ta ofresé un opshon digital tambe, di manera ku desendientenan por buska informashon tokante nan antepasadonan.
Agènda di Akshon: aporte di komunidat
Banda di e inisiativanan akí kada isla tin ku formulá su propio “Agènda di Akshon”. Den esaki ta inkluí proyektonan konkreto ku mester yuda nos komunidat ku prosesamentu di pasado di sklabitut. Ta formulá e Agènda di Akshon di Boneiru den kolaborashon ku gobièrnunan lokal, instansianan kultural i e NGO-nan. E meta ta pa hasi Boneiru su historia visibel na un manera representativo i stimulá oportunidat igual i resiliensia den nos komunidat.
Di dos seshon di “Papia ku Pueblo”
Pa enbolbí nos komunidat ku desaroyo di e Agènda di Akshon, e komishon di Konmemorashon, Impakto i Futuro ta organisá vários seshon di konsultashon bou di e título “Papia ku Pueblo”. E promé seshon a tuma lugá den luna di desèmber, kaminda institutonan a deliberá tokante e desafionan den nan sektor i a stipulá prioridatnan pa Boneiru.
Riba djasabra 22 di mart, for di 08:30 or te 15:00 or, e di dos seshon ta tuma lugá. E enkuentro akí ta enfoká spesífikamente riba e NGO-nan i personanan ku ta aktivo relashoná ku e tema akí. E komishon di Konmemorashon, Impakto i Futuro ta invitá interesadonan pa partisipá i kontribuí na e diskushon.
Partisipashon i kontakto
Bo ta representante di un organisashon kultural òf di un NGO òf bo ta aktivamente enbolbí ku inisiativanan rònt di pasado di sklabitut? E ora ei bo por registrá pa e seshon pa medio di tuma kontakto ku Lauriane Ammerlaan (presidente di Plataforma NGO) via e number di telefòn +599 770 5863.
