Entidat públiko Boneiru ta invitá komunidat pa bin buska un ehemplar grátis di ‘Archivo Spièrtá’. E buki akí ta eksplorá historia i kuentanan di nos antepasadonan, ku un enfoke spesial riba pasado di sklabitut. Por buska e buki riba djaluna 9 di desèmber 2024 di 09:00 or pa 12:00 or na Pòst i Archivo, Kaya Grandi 51.
Serana Angelista ta outor di ‘Archivo Spièrtá’ i e buki akí ta kontené kontribushon di Rowan van der Stelt, Avantia Damberg i Lusette Verboom. E buki ta ofresé un bista den bida i historia di antepasadonan karibense. E buki ta saka informashon for di archivonan históriko pa eksplorá pasado di sklabitut i e ta duna mas konosementu di e impakto ku e komèrsio trans-atlántiko tabatin riba bida di katibu i nan desendientenan. ‘Archivo Spièrtá’ ta eksplorá métodonan manera análisis di DNA, tradishon oral i kontekstonan históriko. E ta pone énfasis riba e desafionan i rikesa di investigashon di palu genealógiko (stamboom) di famia. E ta brinda e lesadónan un oportunidat pa konektá nan mes ku nan desendensia i pa selebrá Boneiru su patrimonio. Importante ta pa menshoná ku a emití e buki na dos idioma, papiamentu i hulandes, den un solo edishon.
E kantidat di buki ta limitá i ta keda repartí segun sekuensia di yegada. Pa e personanan ku no logra haña un ehemplar, e buki ta disponibel tambe pa fia na Biblioteka Públiko Boneiru òf por tira bista den dje na Pòst i Archivo.
Pa mas informashon bo por tuma kontakto ku Geert Stroo via geert.stroo@bonairegov.com òf pasa na Pòst i Archivo na Kaya Grandi 51.
