Dentro di poko Direktorado di Supervishon i Mantenshon di Lei ta kuminsá ku kontròl èkstra di outo ku ta mal stashoná den sentro di Kralendijk. Ku e kontròlnan akí Direktorado di Supervishon i Mantenshon di Lei ke kontribuí na un sentro di siudat seif, aksesibel i ordená pa habitantenan, empresarionan i bishitantenan. Un vehíkulo ku ta mal stashoná, por haña un steker di atvertensia. Den kaso di infrakshon grave òf infrakshon ku ta keda ripití, e kontroladónan por imponé un but tambe òf nan por laga tou e vehíkulo bai kuné.
Ku regularidat tin vehíkulo ku ta stashoná na un manera robes, por ehèmpel riba asera, dilanti di entrada i salida di propiedat di otro hende, na un krusada òf den lugá di stashoná outo di hende ku limitashon. Esaki ta sòru pa situashonnan peligroso i molèster pa peaton, tráfiko i servisionan ousiliar.
Segun e Ordenansa di Tráfiko Boneiru 2019, ta prohibí pa stashoná outo na un manera robes. Pa e motibu akí Direktorado di Supervishon i Mantenshon di Lei visibelmente ta bai tene supervishon i aktua kontra tur infrakshon. E kontròlnan akí ta konektá ku e prioridatnan di maneho di supervishon i mantenshon di lei di e direktorado, kaminda a inkluí instrukshon pa tráfiko i stashonamentu di outo komo punto importante di atenshon.
Direktorado di Supervishon i Mantenshon di Lei ta hasi un yamada riba tur hende pa stashoná outo solamente na sitionan kaminda esaki ta pèrmití i pa tene kuenta ku otro usuarionan di kaminda.
“Un sentro di siudat seif i habitabel ta kuminsá serka nos tur. Pa medio di stashoná outo na un manera korekto, huntu nos ta yuda tene Kralendijk seif i aksesibel,” segun Sherman Blanken, hefe di Departamento di Proyekto i Taskforce di Direktorado di Supervishon i Mantenshon di Lei.
