Na Boneiru nos ta orguyoso di nos bunita ambiente natural. Awor ku Dia di Mama Tera dia 22 di aprel ta aserkando, nos ta pone énfasis riba nos aspirashon pa protekshon di esaki. E tema di e aña akí ‘Planeta kontra Plèstik’ ta rekordá nos riba e nesesidat pa intensivá nos lucha kontra kontaminashon ku plèstik. Nashonnan Uní a hasi un yamada pa yega na un redukshon di produkshon di plèstik ku 60% pa logra e ophetivo final di un futuro liber di plèstik.
Na e momentu akí rònt mundu tin un problema ku plèstik i prinsipalmente mikroplèstik. Plèstik ku ta desintegrá bou di influensia di wer i bientu i rayonan di solo no ta disparsé. Tur kaminda e ta laga mikroplèstik atras – for di fondo di nos oseánonan (11 km hundu) te na e puntonan mas haltu di Mount Everest (8,8 km haltu). Pa motibu ku plèstik no ta deskomponé den naturalesa, e mikroplèstiknan ta forma un problema kresiente pa medio ambiente. Djis pensa akí riba e sòpi di plèstik den vários laman. E partíkulanan ta kita for di tayer di outo, shushi ku hende ta tira riba kaya, paña sintétiko, kosmétiko i fèrf. Por haña mikroplèstik bèk tambe pues den nos kadena di alimentashon. Mata, bestia i hende ta ta apsorbá e partíkulanan. Nan ta den nos kurpa tambe pues. Te ainda e riesgonan di mikroplèstik pa medio ambiente i salú di hende no ta kompletamente klaro.
Na nos isla nos ta haña hopi shushi di plèstik ku hende ta laga tras riba nos bichnan i den nos barionan. Na aña 2020 por ehèmpel mas ku 70% di e shushi ku hende a laga atras na Te Amo Beach tabata konsistí di plèstik. Afortunadamente na Boneiru ya kaba nos a pone algun paso pa eliminá plèstik. For di dos aña ta prohibí pa bende saku, richi, kos pa drai bebida i kuchara, kuchú i fòrki desechabel di plèstik. Ta prohibí tambe pa bende empake desechabel di fom pa kuminda.
Entidat públiko Boneiru ta enkurashá tur hende pa usa artíkulonan reusabel ora esaki ta posibel. Komo habitante i bishitante di nos isla nos tur tin un propio responsabilidat pa mantené nos ambiente di biba i nos naturalesa limpi i saludabel. Por ehèmpel bai ku bo propio kosnan, manera kuchara, kuchú i fòrki òf un propio kùp pa bebe òf un tèrmo. I hasi uso di un tas di kompra sostenibel.
‘Nos ta biba di naturalesa’. Esaki ta konta pa nos tur. Shushi ku hende ta tira riba kaya i den mondi, entre otro hopi plèstik, ta dañino pa nos naturalesa i nos ambiente di biba. Partisipá na un limpiesa di bich, un asina yamá ‘beach clean up’ ta un di e maneranan pa redusí shushi i plèstik ku hende ta laga tras. Tur siman diferente organisashon di boluntario ta organisá esaki. Nos ta invitá tur hende pa sostené e moveshon akí i partisipá na e aktividatnan akí. Huntu nos ta hasi Boneiru mas limpi i mas bunita!
