Entidat Públiko Boneiru ta introdusí un makutu básiko ku 39 produkto básiko. Pa e produktonan akí desde 1 di mart 2023 un preis máksimo ta na vigor. E makutu básiko akí ta konsistí di por ehèmpel bèrdura, fruta, aros, kòfi, karni, kuminda di bleki, kuminda pa beibi, toaya femenino i pèmpers. Pa kada tipo di produkto un preis máksimo ta na vigor pa e marka mas popular i un preis máksimo pa un produkto sin marka. Pues pa kada tipo di produkto a stipulá dos òf mas preis máksimo. Por ehèmpel, un saku di aros blanku di e marka Blue Ribbon di 2 liber ta kosta maksimalmente $ 2,11. Si un komersiante ta bende diferente marka di aros blanku, por lo ménos un di e markanan ei (no Blue Ribbon) mester kosta maksimalmente $ 1,76.
Bon Kompra Plùs
Produktonan ta bira kada biaha mas karu. Esaki tin diferente kousa, manera entre otro preis di kombustibel ku ta subi. Ku e makutu básiko Entidat Públiko Boneiru ke ofresé e konsumidó protekshon den sentido ku no ta bende e produktonan den e makutu básiko pa un preis mas haltu. Banda di esei Entidat Públiko Boneiru ta spera ku hendenan ta bai pensa tokante kon nan ta gasta nan sèn. Ta presentá e makutu básiko bou di e nòmber Bon Kompra Plùs.
Entidat Públiko Boneiru ta sostené poblashon
Último tempu Entidat Públiko Boneiru a hasi hopi kos pa forsa di kompra di nos poblashon. Pa sòru ku abitantenan por gasta mas, a baha preis di koriente. Tambe a tene kosto di bida bou di kontròl kaminda esaki tabata posibel.
Kolaborashon
For di kuminsamentu e supermarketnan ta enbolbí ku e proyekto akí. Nan a haña oportunidat pa partisipá aktivamente na introdukshon di e medida akí. Di e forma akí ta ehekutá e Lei di Preis BES na e manera mas práktiko. A desaroyá e proyekto Bon Kompra Plùs huntu ku departamento di asuntunan ekonómiko di direktorado di planifikashon i desaroyo, direktorado di supervishon i mantenshon di lei, UNKOBON, Fundashon Tienda pa Konsumidó Boneriano i e supermarketnan.
Pa mas informashon tokante Bon Kompra Plùs, tuma kontakto ku departamento di asuntunan ekonómiko di direktorado di planifikashon i desaroyo via directie_ro@bonairegov.com.
