‘Blueberry’ di Albert Heijn posiblemente kontaminá ku hepatítis A

Albert Heijn na Hulanda den forma inmediato ta sakando tur ‘blueberry’ di su propio marka for di su rèkinan. E produkto di dipfris posiblemente ta kontaminá ku hepatítis A. Na Boneiru tambe nan a bende e ‘blueberry’-nan akí. Supermarket Van den Tweel a saka e ‘blueberry’-nan for di su rèkinan. Ta trata di empakenan di 1 kilo ku ‘AH Zakje met blauwe bessen’ ariba. Urgentemente ta supliká klientenan ku tin e produkto akí ku fecha di vensementu 14 di aprel 2026 òf mas tempran na kas pa no kome esaki, pero pa hib’é bèk na e supermarket. E kadena di supermarket a emití un atvertensia pa e establesimentunan na Kòrsou i Boneiru.

RIVM i NVWA a emití vários mensahe tokante esaki. Aktualmente na Hulanda tin 12 notifikashon di persona ku hepatítis A konosí na RIVM. Ta posibel ku mas hende tabatin e infekshon sin ku nan a ripará esaki. Dos pashènt a keda interná den hòspital.

Hepatitis A – Preguntanan mas frekuente

Kon mi ta haña e malesa akí?

Hepatítis A ta un infekshon di higra ku e vírùs di hepatítis A ta okashoná. Hende ta keda kontagiá pa medio di kontakto ku otro hende ku ta malu i pa medio di kome i bebe kuminda òf awa ku ta kontaminá ku shushi humano ku ta kontené e vírùs. Pa bo no bira malu ta importante pues pa laba bo mannan bon promé ku bo kome, promé ku bo prepará kuminda i despues ku bo a bai WC.

Kuantu tempu ta dura promé ku mi bira malu?

E tempu entre e momentu ku bo keda kontagiá i e momentu ku bo bira malu ta dura un promedio di 28 dia. Den sierto kasonan esaki por dura mas kòrtiku (por ehèmpel 2 siman) i serka otro hende esaki por dura kasi 7 siman, promé ku nan haña keho. Mucha bou di 6 aña mayoria biaha no ta haña keho.

Kua ta e kehonan ku mi por haña?

E malesa por ta asina leve ku un hende no ta ripará mes. Hende ku sí ta bira malu, mayoria biaha ta haña molèster di kansansio, kentura leve, tin ora doló den parti ariba di nan barika i walmentu di stoma. Mayoria biaha hende adulto ta haña dehel tambe. Bo ta ripará esaki pa motibu ku bo kueru òf bo blanku di wowo ta haña un koló hel, bo urina ta haña un koló skur òf bo shushi ta haña un koló kla manera stòpvèrf. Tin ora bo kehonan por dura 6 siman. Bo por keda mas tantu tempu ku molèster di kansansio.

Kuantu tempu mi ta keda kontagioso?

Si bo tin keho, e ora ei bo ta keda mas òf ménos un siman kontagioso. Tin ora bo ta bira malu sin ku bo ta haña keho. E ora ei tambe bo ta kontagioso.

Kiko mi tin ku hasi si mi haña keho?

Tuma kontakto ku bo dòkter di kas si bo haña keho. Bisa bo dòkter di kas ku bo a kome e ‘blueberry’-nan akí i si bo tabatin kontakto ku un hende ku tin (tabatin) hepatítis òf dehel.

Kiko mi tin ku hasi ku e ‘blueberry’-nan?

Departamento di Salubridat Públiko a papia ku Supermarket Van den Tweel i ku e departamento di Supervishon i Mantenshon di Lei. Hendenan ku a kumpra e ‘blueberry’-nan di dipfris den saku di 1 kilo ku fecha di vensementu 14-4-2026, por hiba esakinan bèk i haña nan sèn bèk. Por hiba e ‘blueberry’-nan di dipfris di e propio marka di Albert Heijn ku un fecha di vensementu mas tempran tambe bèk. Bo tin mag di tira e ‘blueberry’-nan afó tambe.

Pa sobrá preguntanan tuma kontakto ku departamento di Salubridat Públiko via 715 – 5324​​​​​​​.