Dianan 28 pa 31 di Mei a tuma lugá e di nuebe edishon di e feria Agroalimentaira 2025 na Dominican Fiesta Hotel & Convention Center na Santo Domingo.
E Feria aki ta organisá pa Junta Agroempresarial Dominicana Inc. i Pro Dominicana. E feria aki ta un feria internashonal di kuminda, bebida i tabako.
Un delegashon di Boneiru a bishitá e feria akí konsistiendo di entre otro diesocho empresario. Den e kuadro akí tambe tabatin un bishita di kortesia na Embahada Hulandes. Embahada Hulandes tambe tabatin un ròl pa medio di Sr. Reinier Davina ku a yuda regla bishita na vários fábrika i reunion i a sòru pa un ‘netwerkborrel’.
Na e bishita di kortesia a partisipá empleadonan públiko i miembronan di konseho insular di Boneiru.
E embahador Frank Keurhorst, a risibí e representantenan na e Embahada Hulandes kaminda ela duna un splikashon di e trabou di embahada den komèrsio entre Hulanda i Santo Domingo i e region. Diferente aspekto a bin dilanti, manera sertifikashon, logístika/transporte i konekshon aéreo.
E estrecho koperashon ku Holland House Caribbean ku ta un inisiativa privá pa promové komèrsio den region ku Hulanda tambe a bini dilanti.
Un punto di atenshon ta pa Boneiru ta mas envolví den mishonnan komersial regional, di manera ku nos isla por probechá mas di e oportunidatnan ku tin den region.
