Mas bibienda Pagabel na Boneiru den tempu korto. Esaki ta un di e prioridatnan di Gobièrnu di Boneiru pa e siguiente 4 añanan.
Mirando kon nos poblashon a krese den e lastu añanan, e nesesidat pa un bibienda a bira mas grandi. Ku konsekuensia ku prijsnan pa bibienda riba merkado privá a subi extremadamente. Esaki ta hasiendo e proseso muchu mas difisil pa nos komunidat por haña un bibienda pagabel, segun Diputado Thielman.
Komo Gobièrnu di Boneiru nos ke krea un vishon inovativo pa ku bibienda sosial segun Diputado Kroon. Nos vishon ta pa krea mas bibienda pagabel, modèrno i di kalidat. Nos ke pa mas i mas hende den nos komunidat por bira doño di nan propio kas, kuminsando na:
- Famianan ku entrada mas abou i medio;
- Nos hóbennan profeshonal;
- Adultonan di 50+
P'esei durante di e biahe di Kolegio Ehekutivo na Hulanda siman pasá, a hiba diferente kòmbersashon i reunionnan ku instansianan na Hulanda (entre otro ministerio di Bibienda Popular i Ordenamentu Teritorial) pa asina por krea un akuerdo kaminda ta konstruí un kantidat grandi di bibienda na Boneiru den un tempu kòrtiku.
Ta e intenshon pa den e próksimo simannan finalisá e akuerdo aki, pa asina por firma esaki na e siguiente bishita di minister di Bibienda Popular i Ordenamentu Teritorial, sr. Hugo de Jonge.
