For di 21 te ku 29 di yüli 2026 dos inspektor di Direktorado di Supervishon i Mantenshon di Lei di Entidat Públiko Boneiru a hasi un bishita di trabou na Sint Eustatius. Konhuntamente ku algun inspektor di Sint Eustatius nan a ehekutá vários inspekshon i nan a kompartí konosementu i ekspertisio. Di e manera akí e islanan BES ta traha huntu riba un ehekushon fuerte, profeshonal i resiliente pa futuro di supervishon i mantenshon di lei.
Durante e siman di inspekshon e inspektornan konhuntamente a ehekutá kontròl na entre otro diferente supermarket, pòmp di gasolin i lokalidat di karga. Nan a kontrolá entre otro siguridat di kuminda, midimentu korekto i kumplimentu ku lei i regla. Pa medio di e kolaborashon nan por a hasi mas kontròl i nan por a duna mihó sosten na empresanan pa loke ta trata kumplimentu ku regla.
Banda di e kontròl, e inspektornan a interkambiá eksperensia i nan a siña di otro su sistema di traha. Di e manera akí e kalidat di supervishon i mantenshon di lei na islanan BES ta keda fortifiká mas aleu, i e islanan mas i mas ta traha segun e mesun sistema.
Direktorado di Supervishon i Mantenshon di Lei ta gradisí e koleganan di Sint Eustatius pa e manera kaluroso ku a risibí nan i e kolaborashon plasentero. Desaroyo personal i profeshonal di e empleadonan den Direktorado di Supervishon i Mantenshon di Lei ta importante. Pa e motibu akí aktivamente ta stimulá e empleadonan pa desaroyá nan konosementu, abilidatnan i eksperensia mas aleu. Kolaborashon i interkambio di konosementu ku koleganan na e otro islanan BES ta kontribuí na esaki. E siman di inspekshon konhunto akí ta sigui konstruí riba e bunita fundeshi akí pa mas kolaborashon den futuro entre Boneiru, Sint Eustatius i Saba.
