Kolegio Ehekutivo di Entidat Públiko Boneiru (EPB) a tuma nota di spekulashonnan ku ta sirkulando tokante e tereno na Sorobon ku ta den uso pa The Frans Paradise. Segun e informashonnan aki, EPB, pa medio di Direktorado di Supervishon i Mantenshon di Lei (DTH), lo tin e intenshon pa kita òf retirá e tereno aki. Kolegio Ehekutivo ta enfatisá ku e informashon aki ta inkorekto. DTH a risibí señalnan ku tin trabounan di konstrukshon tumando lugá riba un tereno di gobièrnu i abase di esaki a tene un kontròl.
Direktorado di Supervishon i Mantenshon di Lei no tin outoridat pa kita tereno
Promé ku tur kos, Kolegio Ehekutivo ke klarifiká ku Direktorado di Supervishon i Mantenshon di Lei no tin e mandato ni e outoridat pa duna, kita òf retirá tereno ku ta den uso pa terser persona.
Kontròlnan legal den e área di RAMSAR
Loke Direktorado di Supervishon i Mantenshon di Lei sí ta ehekutando den e área di Sorobon, ta su tarea legal regular. Sorobon ta outorisá komo un área di RAMSAR (un área di bota di importansia internashonal), loke ta eksigí koutela èkstra pa loke ta trata maneho di medio ambiente i órden públiko.
E direktorado ta realisando bishitanan na tur empresa ku ta aktivo den e área di Sorobon pa:
- konstatá e aktividatnan ku ta tumando lugá einan;
- verifiká si e aktividatnan aki ta keda ehekutá denter di e kuadronan legal i reglanan vigente.
Trayektonan individual
Kada empresa individualmente tin e obligashon pa kumpli ku lei i regulashon. E proseso aki ta uniforme pa tur empresario den e área i no ta dirigí spesífikamente riba terminashon di aktividatnan empresarial, sino riba regulashon di esakinan segun lei. DTH kier rekordá ku ta prohibí pa konstruí riba tereno di gobièrnu sin un pèrmit bálido.
