Entidat públiko Boneiru ta rekordá tur empresario i doño di tienda ku sin pèrmit no ta pèrmití pa bende merkansia òf pone stènt, rèki i mesa riba kaminda públiko pa aktividatnan komersial. E reglanan akí ta stipulá den artíkulo 9 di e Ordenansa General di Polis (Algemene Politieverordening) i tur hende mester kumpli ku esakinan pa salbaguardiá siguridat, aksesibilidat i òrdu na nos isla.
Ku Black Friday na kaminda, Direktorado di Supervishon i Mantenshon di Lei a haña sierto señalnan tokante posibel akshonnan di benta, kaminda ta bai usa espasio públiko sin pèrmit. Entidat públiko Boneiru ta enfatisá ku e tipo di aktividatnan akí no ta pèrmití i ku den un forma severo lo praktiká mantenshon di lei den kaso di violashon. Keda sin kumpli ku e reglanan akí por kondusí na sanshon, manera kitamentu di opheto i dunamentu di but.
Kiko sí i kiko no ta pèrmití?
Loke no ta pèrmití: Pone stènt, rèki, mesa òf otro otro material di benta riba asera òf den otro espasio públiko. Loke sí ta pèrmití: Organisá akshon di benta den e propio espasio di tienda òf riba tereno privá, basta ku esaki ta kumpli ku e regulashon vigente.
Dikon e reglanan akí ta importante?
Espasio públiko ta aksesibel pa tur hende i mester keda liber di opstákulo ku por stroba peaton, tráfiko òf servisionan di emergensia. Pa medio di praktiká mantenshon di lei den forma estrikto relashoná ku e reglanan akí, huntu nos ta sòru pa un Boneiru mas seif i mas ordená, kaminda tin sufisiente espasio pa tur habitante i tur bishitante.
Supervishon i mantenshon di lei den forma aktivo
Den e tempu binidero Departamento di Supervishon i Mantenshon di Lei ta bai kontrolá aktivamente pa loke ta trata kumplimentu ku regla. Empresarionan ku sin pèrmit ta hasi uso di espasio públiko, ta kore riesgo di haña sanshon. Pa e motibu akí nos ta hasi un yamada na tur doño di tienda pa tene nan mes na regla, i den kaso ku esaki ta nesesario, hasi petishon na tempu pa un pèrmit.
Mas informashon
Pa mas informashon tokante pèrmit i regla rònt di uso di espasio públiko, bo por tuma kontakto ku Direktorado di Supervishon i Mantenshon di Lei via e number di telefòn 715 – 5330 durante ora di ofisina òf via e emailadrès: directie_th@bonairegov.com.
