Na Boneiru apertura ofisial di e Weganan Interinsular a tuma lugá ayera. Delegashonnan for di Aruba, Kòrsou, Saba, Sint Eustatius, Sint Maarten i, pa promé biaha, Sürnam tabata presente na e apertura.
Partisipashon di Sürnam ta un paso importante pa kresementu di e Weganan Interinsular. E ta un indikashon ku kada biaha mas isla i pais ke traha huntu pa medio di deporte.
Diputado Silberie di Entidat Públiko Boneiru a duna un kaluroso bon biní na e funshonarionan haltu, e atletanan hóben, e coachnan i e otro miembronan di tim. El a ekspresá su apresio pa tur hende ku ta partisipá i ku ta yuda ku e organisashon. Segun e diputado, na e Weganan Interinsular no ta bai solamente pa gana, pero tambe pa hasi deporte huntu, topa otro i siña di otro.
E promé kompetensianan di e Weganan Interinsular ta tuma lugá dia 27 i 28 di febrüari 2026 na Boneiru. Despues di esei Kòrsou ta e isla anfitrion. Den luna di mart ta klousurá e Weganan Interinsular na Aruba.
Tin kòmbersashon tumando lugá pa hasi e Weganan Interinsular mas grandi den futuro. Meta di esaki ta pa duna mas hóben oportunidat pa partisipá i pa fortifiká e kolaborashon den region mas aleu.
