Ku palabranan inspirativo, presentashonnan kultural i un seremonia simbóliko di kòrta sinta, riba djabièrnè 21 di mart apertura ofisial di Biblioteka Públiko Boneiru nobo a tuma lugá. E reunion festivo a marka un kapítulo nobo pa e biblioteka komo é sitio di enkuentro pa nos komunidat lokal, kaminda siña, topa otro i deskubrí ta sentral.
Wilco Harbers a habri e seremonia ku un poesia, siguí pa diskurso di diputado Nina den Heyer i Youssef Louakilo di ministerio di Enseñansa, Kultura i Siensia. Despues di un presentashon enérgiko di baile di School of Performing Arts, e hefe di departamento Jennifer Pocornie-Martis i kwartiermaker Ilse Verburgh tambe a kompartí nan palabranan tokante e ròl di biblioteka i e proseso ku mester a kana pa yega na e apertura. Seguidamente Maidi Martijn a presentá un ‘spoken word act’ hopi fuerte, i despues di esei e arkitekto Aat Vos i gezaghèber interino Ingrid Sealy a papia tokante importansia di e sitio nobo di enkuentro akí pa Boneiru. Durante e apertura a para ketu tambe na dedikashon di hopi partido ku a hasi e proyekto akí bira posibel. Spesialmente diputado Den Heyer tambe a haña gradisimentu pa su esfuerso i prioridat di hopi aña largu pa desaroyo di e biblioteka. “I tur otro hende ku a hinka nan skoudernan bou di e trabou akí”, asina Pocornie- Martis a bisa den su diskurso.
Komienso impreshonante
E edifisio moderno, ku tin dos siman den uso kaba, for di e ‘soft opening’ a yama bon biní na no ménos ku 3300 bishitante i 261 miembro nobo a inskribí. Pa kompará: den henter aña 2024 a registrá 334 miembro nobo. “Pa komprendé e impakto bon: awor, dentro di dos siman, ya kaba 261 miembro nobo a bini aserka”, asina Pocornie-Martis a enfatisá durante e apertura. “Esaki ta suprayá e importansia kresiente ku e biblioteka tin pa nos komunidat.” Ku e biblioteka ta laga un impreshon spesial atras, ta resultá for di reakshon di bishitantenan. “Un mucha ku ta yora pasobra e no ke bai kas – nos a tende e remarke akí diferente biaha. Esaki ta bisa tur kos tokante forsa di atrakshon di e sitio akí”, asina el a kompartí.
Yamada na komunidat
Despues di e diskursonan e momentu ofisial a tuma lugá: e kòrtamentu di sinta ku a simbolisá apertura di e biblioteka. Un yamada a bai na komunidat di Boneiru pa sigui brasa e biblioteka. “Laga nos tesorá e biblioteka akí, hasi bon uso di dje i lag’é krese. Mi ta invitá boso tur pa wak rònt awe, habri un buki i brasa e sitio akí komo un kas di konosementu, inspirashon i enkuentro.” Ku e aperturá festivo akí nos a alkansá un logro importante, pero e biblioteka ta keda den desaroyo. “Laga nos huntu komo komunidat kuida nos biblioteka berdaderamente bon”, asina a keda aksentuá finalmente.
