Riba djaweps 27 di febrüari, 60 alumno di Liseo Boneriano, kompañá pa nan guianan, a hasi un bishita inspirativo na Kunuku Copacabana na kosta pariba di Boneiru. E bishita tabata den signo di outosufisiensia, esta kon nos ta produsí nos propio kuminda, i e impakto di kambio di klima riba nos isla.
Resepshon i introdukshon típiko boneriano
E dia a kuminsá ku un kaluroso resepshon kaminda e alumnonan a disfrutá di algu di kome i algu di bebe típiko boneriano. Seguidamente e grupo di proyekto Mesa di Klima Boneiru a tene un introdukshon tokante e efektonan mundial di kambio di klima i e konsekuensianan spesífiko pa Boneiru. Nan a enkurashá e hóbennan pa bai den kòmbersashon tokante esaki ku nan mayornan i nan amigu- i amiganan.
Rekorido i agrikultura sostenibel
Durante e rekorido na Kunuku Copacabana, kuater tema importante a bini dilanti:
- Produkshon di kòmpòst
- Produkshon di lechi for di lechi di kabritu
- Kultivo di bèrdura
- Produkshon di mainshi chikí (sorghum)
E kunuku ta hasi uso optimal di rekursonan natural, manera energia solar i awa di yobe pa irigashon i kuido di animal, loke ta kontribuí na un práktika sostenibel di agrikultura.
Inspirashon pa un futuro outosufisiente
Kunuku Copacabana ta fungi komo un empresa modelo pa agrikultura sostenibel na Boneiru. E bishita no solamente a ofresé e alumnonan konosementu di métodonan inovativo di agrikultura, pero el a stimulá nan tambe pa pensa tokante un futuro outosufisiente pa nos isla, kaminda kuminda lokal ku rèspèt pa naturalesa ta para sentral.
