GGD Bonaire / Salubridat Públiko ta vigilá henter aña kua malesanan infeksioso tin riba nos isla. Kada trimèster nos ta duna un aktualisashon kòrtiku. Asina tur hende ta keda na altura di loke ta pasando i kiko abo mes por hasi pa keda salú.
Barkunan
Rònt mundu kada barku, promé ku drenta un haf, mester yena un deklarashon di salú. Akiriba tin pará si tin persona malu na bordo. Si tin hende ku un malesa kontagioso, ta informá GGD Bonaire / Salubridat Públiko. GGD Bonaire / Salubridat Públiko ta evaluá e situashon e ora ei i ta duna e barku konseho si ta nesesario. Masha poko ta nenga un barku, pero esei kasi nunka no ta sosodé.
Den e di dos trimèster di 2026 (Q2) GGD Bonaire / Salubridat Públiko a risibí deklarashon di salubridat di 39 barku (krusero). E kantidat di hende malu na bordo tabata abou riba mayoria di e barkunan krusero.
Den e region karibense, fin di aprel a reportá un brote relativamente grandi riba e barku krusero Caribbean Princess, kaminda hopi pasahero i tripulante a sufri di molèster di stoma (Norovirus). E barku akí no a bin Boneiru. Lesa aki mas al respekto.
Internashonalmente a reportá tambe un brote di Hantavirus riba un barku krusero hulandes M/V Hondius. Lesa aki mas tokante e brote akí.
Ambos situashon ta demostrá importansia di nos tarea di salubridat públiko den haf, kaminda nos ta trata di garantisá ku malesanan kontagioso no ta yega Boneiru via di barku (krusero).
Síntomanan di grip & ferkout
E kantidat di persona ku na aprel, mei i yüni (Q2) a bai nan dòkter di kas ku síntomanan di grip- òf ferkout, tabata mas abou ku den e mes periodo na 2021-2025. Den Q1 esaki tabata e kaso tambe. Posiblemente ménos hende ta bai nan dòkter di kas ku e síntomanan akí, di manera ku e parse di ta mas leve e aña. Di laboratorionan, den Q2 nos a mira partikularmente Rhino/Enterovirus (un vírùs di ferkout) i RSV, un vírùs ku ta aparesé partikularmente bou di mucha chikitu.
Konsulta di salú seksual
Desde òktober 2025 e konsulta di GGD Bonaire / Salubridat Públiko tokante salú seksual a kuminsá. E konsulta akí ta pa tur hende ku tin pregunta tokante amor, sèks, relashon, antikonsepshon òf soa (malesanan seksualmente traspasá). E konsulta ta un suplemento riba kuido eksistente na Boneiru.
Den Q2 enfermeronan a mira 50 kliente di kende 45 a tèst pa soa. En total a tèst e aña akí 72 kliente, di nan 15 kliente tabatin klamydia i 1 kliente gonorrea.
Malesanan transmití pa sangura
Den Q2 poko hende a bai dòkter di kas ku keho di un malesa transmití pa sangura, manera dengue òf chikungunya. Ultimo lunanan tabatin solamente algun kaso di dengue.
Na tur klínika di dòkternan di kas tin poster kologá ku un kódigo di QR. Ora skèn e kódigo di QR akí, kada persona ku keho ku ta kuadra ku un malesa transmití pa sangura, por mèldu ku tin (molèster) di sangura. Inspektornan di e tim di vèktor ta bai kontrolá kada bia ku un notifikashon drenta, si tin kriadero di sangura den e besindario. Si topa ku esakinan, ta trata nan. Nan ta duna tep tambe kon pa prevení plamamentu.
Bo tin pregunta tokante malesanan transmití pa sangura? Wak e ora aki bou di preguntanan frekuentemente hasí.
Konsulta pa biaheronan
Den eksterior tin bia tin otro malesanan kontagioso ku na Boneiru. Biaheronan por protehá nan mes kontra esakinan, buskando konsehonan di biahe òf bakunanan na tempu via GGD Bonaire / Salubridat Públiko. P’esei GGD Bonaire / Salubridat Públiko, pa medio di un komunikado di prensa a bolbe pidi atenshon pa e konsulta pa biahero, partikularmente pa biaheronan ku ta bai Kopa Mundial. Den Q2, GGD Bonaire / Salubridat Públiko a tene 218 konsulta di biahero, dòbel mas tantu kompará ku e mas di 100 konsulta den Q1. Aki tabata trata partikularmente di biaheronan pa Colombia, Sürnam, Panamá, Brazil i Perú.
Bakuna kontra keintura gel ta obligatorio pa biaheronan ku den e dies dianan promé ku yega Boneiru, tabata den un área di riesgo haltu, manera Colombia. Tambe pa mucha i beibi for di 9 luna.
Pa mas informashon: · Yama (+599) 715 5324 òf meil IZB@bonairegov.com · Lesa aki mas.
Keho di stoma
Den Q2 mas hende a bai dòkter di kas ku keho di stoma, kompará ku e lunanan anterior. Den e dianan di Dia di Rei a mèldu un brote relashoná ku kuminda na un skol. Diferente dosente i alumno a haña keho di stoma despues di un komementu. Huntu ku e skol, GGD Bonaire / Salubridat Públiko a investigá kiko lo por tabata e kousa. Tur alumno i dosente a rekuperá rápidamente.
Entre mei i komienso di yüni tambe, diferente siman tras di otro, mas persona ku normal a mèldu serka dòkter di kas ku malu di barika. Kuater siman largu e kantidat di pashènt di dòkternan di kas tabata riba e nivel ku a spera. GGD Bonaire / Salubridat Públiko den e periodo akí a investigá posibel kousa. Huntu ku Bonlab N.V. a averiguá si e oumentu tabata okashoná pa un bakteria òf vírùs spesífiko.
For di esaki a resultá ku diferente persona tabatin un infekshon di STEC. STEC ta un bakteria ku por kousa síntomanan manera diarea (ku sanger) i doló di barika. Infekshon por sosodé via kuminda, awa òf kontakto ku bestia. Baka, kabritu i karné ta e bestianan mas importante ku por tin e bakteria.
Ounke mayoria hende ta rekuperá kompletamente, e infekshon den kasonan raro por kousa komplikashon serio, manera problema di nir. No a haña relashon entre e diferente personanan ku un infekshon di STEC. Pa e motibu akí no por a determiná si nan a keda infektá pa medio di e mes fuente òf e mes manera.
GGD Bonaire / Salubridat Públiko ta konsehá tur hende pa mantené bon higiena ora di prepará i kome kuminda. Bon higiena i siguridat di kuminda ta redusí e chèns di haña malu di barika. Despues di kontakto ku otro bestia tambe, manera burikunan ku ta kana rònt riba Boneiru, bon higiena di man ta importante pa redusí chèns pa haña diferente infekshon.
