Q4 aktualisashon malesa kontagioso

hMPV

Na China den e último simannan tin un oumento di infekshon (grave) di via respiratorio. Den medionan di komunikashon esaki ta sòru pa hopi atenshon i pregunta tokante e metapneumovírùs humano (hMPV). HMPV no ta un vírùs nobo i e ta presentá mas biaha den temporada di grip i e no ta relatá solamente na China, pero ta topa práktikamente tur kaminda kuné. Un persona ku keda kontagiá ku e vírùs, hopi biaha ta haña keho leve ku ta parse grip i fèrkout. Serka sierto hendenan e vírùs por kousa pulmonia òf keho mas grave, por ehèmpel personanan ku tin un sistema imunológiko débil. Salubridat Públiko ta traha huntu ku e laboratorionan, dòkternan di kas i hòspital pa vigilá e vírùsnan di via respiratorio.

Dengue

Den e último kuartal di aña 2024 (e lunanan óktober, novèmber i desèmber) nos a mira e kantidat di Dengue oumentá. Prinsipalmente den luna di desèmber tabatin mas hende ku un infekshon di Dengue. Den e último tres lunanan tabatin en total 36 kaso konfirmá. Nos a mira mas tantu kaso di Dengue ku den e mesun periodo den aña 2023.

Mayoria hende ku un infekshon di Dengue tin keho leve. Tòg tabatin algun hende tambe ku mester a bai hòspital pa motibu di Dengue. Si anteriormente bo tabatin Dengue kaba, den mayoria kaso bo ta protehá pa algun luna. Despues di esei bo por bolbe bira malu atrobe sí di un otro variante di Dengue.

Ku kada notifikashon di Dengue, e inspektornan di nos tim di vector ta bai wak si tin lugá di brui di sangura den i rònt di e kas i nan ta trata esakinan. Nan ta duna tep tambe pa prevení plamamentu. Tanten ku tin sangura di Dengue i e vírùs di Dengue na nos isla, Dengue no por disparsé kompletamente, pero nos por purba limit’é sí. Bo tin pregunta tokante Dengue? E ora ei wak riba www.bonairegov.com/pa/sangura kaminda tin e preguntanan mas tantu hasí (Q&A’s).

Kampaña di bakunashon den e último lunanan di aña

Durante e último lunanan di aña 2024 Salubridat Públiko i e ofisinanan di dòkter di kas a ofresé bakunashon kontra grip i bakunashon kontra COVID-19. Tur hende ku a bini na remarke pa pasa angua, a haña un karta adelantá. Tambe a hinka un kampaña den otro via medionan sosial i medionan di komunikashon. En total 916 hende a pasa angua kontra COVID-19 i na Salubridat Públiko 286 hende a pasa angua kontra grip. Banda di esaki na e ofisinanan di dòkter di kas tambe hopi hende pa pasa angua kontra grip. Mas tantu hende a pasa angua kontra grip kompará ku aña pasá. Wak riba e páginanan tokante bakunashon kontra grip i grip pa mas informashon.