Kiko ta grip?

Grip ta un malesa ku un vírùs ta kousa. Hopi hende ta kere ku nan tin grip ora nan tin molèster di tosamentu, nanishi será i fèrkout. Generalmente esaki ta dura solamente un par di dia i hopi biaha no ta grip sino fèrkout. Grip por dura 1 pa 2 siman i tin síntomanan mas severo manera tambe kentura haltu, doló di múskulo fuerte i kansansio. Grip no ta meskos tampoko ku COVID-19. Un otro vírùs ta kousa COVID -19.

Kon mi ta haña grip?

E vírùs di grip ta pasa di persona pa persona via airu ku hende ta saka. E vírùs ta plama den airu ora un persona tosa òf nister i ta infektá un otro persona ora e persona akí inhalá e vírùs. Por dura algun dia promé ku bo bira malu di e vírùs. Grip ta un malesa ku bo ta haña tur kaminda, no solamente na paisnan friu, i pues na Boneiru tambe.

Kon mi ta rekonosé grip?

Tur hende por haña grip. E síntomanan ta:

• Kentura
• Doló di kabes
• Tosa
• Doló di garganta
• Doló di múskulo
• Ménos gana di kome
• Nanishi será

Ken ta kore mas riesgo?

Tin sierto grupo di riesgo ku tin chèns pa haña konsekuensia grave (manera pulmonia òf problema ku kurason) ora nan haña grip.

• Personanan ku keho di kurason
• Personanan ku problema di pulmon manera asma, bronkítis, etc.
• Personanan ku suku
• Personanan ku problema ku nir
• Personanan ku resistensia abou
• Personanan riba 60 aña

Si bo ta pensa ku bo ta pertenesé na un di e gruponan di riesgo menshoná, ta rekomendabel pa tuma kontakto ku bo dòkter di kas.

Kon mi por prevení grip?

E vírus di grip ta den garganta di un hende ku ta infektá. Ora tosa i nister, drùpel chikitu ku e vírùs ta bin den airu. Hende por inhalá e drùpelnan akí i haña infekshon. P’esei tosa i nister den bo èlebog òf lensu di papel. Hende por haña e vírùs tambe via man i opheto. P’esei laba man regularmente ku awa i habon. Grip ta kontagioso for di 1 dia promé ku inisio di keho te 5-7 dia despues di inisio di e kehonan.