Investigashonnan di Naturalesa Boneiru

Relashoná ku e kandela na e sitio di depositá shushi na Lagun dia 5 di novèmber 2024, e Instituto di Reino pa Salubridat Públiko i Medio Ambiente (Rijksinstituut voor Volksgezondheid en Milieu – RIVM) riba enkargo di Entidat Públiko Boneiru a hasi investigashon di muestra di suela, di mata i di loke nan a bari. Dia 20 di desèmber nos a risibí e rapòrt kompleto di MOD. E rapòrt ta brinda konosementu importante pa salbaguardiá salú i siguridat di nos komunidat.

E investigashonnan di MOD tin un karakter indikativo; den un tempu kòrtiku nan a tuma un kantidat limitá di muestra (7) pa identifiká e área di impakto di e kandela di 5 di novèmber 2024. Tokante e resultadonan provishonal di e investigashon akí, anteriormente a publiká un mensahe relashoná ku balornan klaramente mas haltu di dioksina den vegetashon dentro di e zona di 2 kilometer parti pabou di e kandela.

Konklushonnan mas importante:

1. Pa kasi tur e metalnan pa kua ta eksistí balornan límite pa loke ta trata salú, no ta surpasá e balornan.
2. Den tur midimentu ku nan a hasi di suela i di stòf ku nan a bari, nan a haña konsentrashonnan mas haltu di chumbu, tambe pafó di e área di impakto di e kandela di 5 di novèmber 2024. Ta posibel pues ku e chumbu ta prosedente di un otro fuente (tambe) ku no ta lèntfel.
3. Análisis di PAK (hidrokarburo aromátiko polisíkliko) i dioksina riba suela i di e stòf ku nan a bari, ta indiká ku e riesgo pa eksposishon na PAK i dioksina via suela no ta mas haltu.

Área di impakto:

No tin indikashon ku empresanan agrario pa kultivo òf webu tin di haber ku efektonan di e kandela di 5 di novèmber 2024. Kandelanan anterior di shushi di kas, tantu na Lagun komo na kasnan òf den áreanan no-residensial por a kontribuí na deposishon di dioksina riba vegetashon pafó di e área di impakto direkto di e kandela.

Konseho:   

E perspektivanan di akshon pa hendenan dentro di e área di impakto manera a duna anteriormente no ta kambia. Kumpli ku e konsehonan akí pa evitá posibel riesgonan pa salú.

1. No kome bèrdura di blachi, manera spinashi, amsoi, paksoi, bembe i kròpsla, i no kome fruta ku bo no a laba i produktonan di bestia for di e área di impakto di e kandela.
2. Relashoná ku e resultadonan nobo, ta deseabel tambe pa tene eksposishon duradero na chumbu den stòf i den suela mas abou posibel. Pa mucha ku ta hunga pafó, esaki ta nifiká ku nan tin ku laba man regularmente i limpia e kosnan ku nan ta hunga kuné.

Konseho di MOD:

• MOD ta konsehá Entidat Públiko Boneiru pa evitá deposishon di dioksina, PAK i metal den bisindario, pa medio di evitá mas tantu posibel ku ta surgi kandela.
• MOD ta konsehá Entidat Públiko Boneiru pa identifiká e diferente fuentenan di dioksina na Boneiru i hasi investigashon di eksposishon na dioksina via kuminda.