ECL

Rapòrt di Environmental Compliance Limited (ECL) ta ofresé konosementu nobo di emishon di supstansianan dañino di parti di e anterior instalashon di kima shushi di Selibon N.V. E investigashon di e anterior instalashon di kima shushi, ku a keda ehekutá den luna di febrüari 2024, a proba ku a surpasá e normanan di emishon pa supstansianan dañino konsiderabelmente. Esaki ta lanta pregunta tokante e impakto riba salú i medio ambiente. Meta di e investigashon tabata pa midi e emishon durante un periodo kòrtiku di tèst i pa evaluá si e instalashon ta kumpli ku normanan di e pèrmit.

Konklushonnan mas importante

Resultadonan di e tèst ta mustra lo siguiente:   

• Surpaso di e normanan di emishon: Serka vários supstansia dañino ku por kousa iritashon na via respiratorio i wowo, e normanan a keda surpasá.
• Posibel eksposishon na supstansianan dañino: Durante e periodo operashonal (2018 – 2023) tin un chèns ku e habitantenan den e bisindario i medio ambiente a bini den kontakto ku supstansianan dañino.
• No tin konsentrashonnan mas haltu den suela: Un investigashon di suela ku Riskcontrol a hasi den luna di febrüari 2024 no a mustra ku tin konsentrashonnan mas haltu di supstansianan dañino.

Pa motibu ku bientu ta plama e gasnan i e partíkulanan, no por pone un vínkulo direkto ku e supstansianan den suela i e eksposishon efektivo na hende.

Akshonnan di Kolegio Ehekutivo

Relashoná ku e konklushonnan akí, Kolegio Ehekutivo a disidí:

1. Pa suspendé uso di e instalashon di kima shushi; no ta bai hasi uso di e instalashon akí mas.
2. Pa hasi investigashon adishonal pa komprendé e posibel konsekuensianan di e emishon mihó.
3. Pa huntu ku partnernan di konosementu manera RIVM realisá un programa di investigashon pa identifiká fuentenan di kontaminashon i pa tuma medida pa evitá kontaminashon nobo.

Transparensia i komunikashon

Kolegio Ehekutivo ta duna importansia grandi na komunikashon habrí. E rapòrtnan kompleto di ECL i MOD ta disponibel riba wèpsait di Entidat Públiko Boneiru. Via e seshon semanal ‘Gobièrnu ta informá’, Kolegio Ehekutivo ta tene habitantenan na altura di e último desaroyonan.   

Salú públiko di komunidat boneriano ta para sentral den aserkamentu di e problemátika akí. Kolegio Ehekutivo ta komprometé su mes pa huntu ku su partnernan i habitantenan traha riba solushonnan duradero.