Impuesto di turista

Promé ku 1 di yüli 2024

Entrante 1 di yüli 2024 Boneiru tin un sistema nobo pa kobransa di e impuesto di turista. Promé ku e tempu ei tabata kobra un impuesto di wéspet di alohamentu (roomtax) di $ 5,50 pa persona pa anochi via e suministradónan di akomodashon i e kompanianan di hür outo tabata kobra un impuesto di hürmentu di outo (cartax) di $ 4 pa dia.

E sistema bieu tabata kompleho i kobransa i entrega di e impuesto den un forma korekto tabata un reto. Pa e motibu akí hopi biaha no tabata kobra i entregá e impuesto kompletamente. Esaki tabata sòru pa un desigualdat grandi den sektor turístiko.

For di 1 di yüli 2024

E impuesto di turista nobo (Visitor Entry Tax) ku a drenta na vigor entrante 1 di yüli 2024, ta remplasá e impuesto di wéspet di alohamentu i e impuesto di hürmentu di outo i nan ta kobra tur no residente ku ta bishitá nos isla esaki.

Tarifa

  • E impuesto di turista nobo ta suma $ 75 pa persona.
  • Mucha te ku 12 aña, e asina yamá Yunan di nos Isla, i habitantenan di e otro 5 islanan di e anterior Antia Hulandes ta paga $ 10 pa persona.
  • Studiantenan boneriano ku un deklarashon di Lei di Fiansiamentu di Estudio BES òf ku un prueba tangibel ku nan ta studia fultaim den eksterior.
  • Residentenan di Boneiru ta haña eksonerashon.
  • Pasaheronan krusero ta paga $ 10 pa persona, ku e kompania di barku ta entregá na Entidat Públiko Boneiru.

Pa e tarifanan di eksepshon akí tin mester di dokumentu di prueba pa proba ku un hende ta bini na remarke pa un tarifa redusí òf pa eksonerashon. Si no por mustra dokumentu di prueba, e ora ei e tarifa ta $ 75 pa persona. 

Dokumentunan di prueba ku ta nesesario pa un tarifa di eksepshon òf pa eksonerashon

Pa bini na remarke pa un tarifa di eksepshon di $ 10 òf pa un eksonerashon kompletu, mester mustra e agentenan na aeropuerto òf den haf e dokumentunan di prueba. Si e dokumentunan di prueba no ta bálido, no korekto òf no por mustra nan, e ora ei mester paga e tarifa kompletu di $ 75.

Balides di e tarifa

Balides di un QR-code ku bo a optené ta un (1) luna. Esaki ta konta pa tur tarifa. Den e luna di balides akí bo por bishitá e otro islanan, e asina yamá ‘Island Hopping’, i drenta Boneiru bèk via aeropuerto òf haf sin ku bo tin ku paga di nobo.

Na momentu ku bo ta drenta Boneiru pa un di dos òf mas biaha, e ora ei sí pa medio di un prueba di identidat bo tin ku proba ku e QR-code ta riba bo propio nòmber. Si esaki no ta e kaso, bo tin ku paga di nobo. Tambe t’asina ku den kaso di e tarifanan di eksepshon, nan por pidi e dokumentunan di prueba un biaha mas.

Paga online adelantá pa spar tempu

E persona ku ta bishitá nos isla por paga e impuesto di turista nobo online via  https://tourismtax.bonairegov.com/. Por hasi esaki for di 7 dia promé ku e biahe pa Boneiru ku creditcard òf pago Ideal. Despues di e pago bo ta risibí un QR-code ku bo tin ku mustra na yegada na aeropuerto. Despues di a mustra e dokumentunan di prueba, bo por sigui kana mesora pa bai duana. Semper paga promé ku yegada na Boneiru! Esaki ta evitá ku innesesariamente bo tin ku warda hopi, promé ku bo por bai buska bo maleta. Ta posibel pa paga na aeropuerto. Paga tinu! Por hasi esaki solamente ku karchi di banko.

No ta aseptá pago kèsh. Esaki ta konta pa tantu aeropuerto komo haf.

Paga tinu riba wèpsait di rebendedó (bendedó ‘fake’) ku tarifa haltu

Tin rebendedó aktivo ku ta pidi tarifa haltu pa nan ‘servisio’. Regularmente ta sosodé ku un rebendedó ta kobra bo gastu i no ta manda un QR-code i banda di esaki ta kobra sèn èkstra.

Paga tinu! Paga solamente via nos wèpsait ku un nòmber di domein ku ta kaba ku ‘bonairegov.com’ i nunka no paga mas ku $ 75.