E maneho di idioma na Boneiru ta kuadra ku e komunidat multilingual di e isla. Papiamentu ta e lenga materno di un parti grandi di poblashon, e idioma mas importante den e ambiente lokal í e idioma unifikante di sosiedat boneriano. Ta e idioma den kua hendenan den bida diario ta topa otro, komuniká ku otro i sinti nan mas konektá ku nan isla, kultura i komunidat.
Ku esei papiamentu ta forma un base importante pa e desaroyo multilingual di Boneiru. Fortalesé papiamentu no ta nifiká ku otro idiomanan ta bira ménos importante. Al kontrario: un posishon fuerte di idioma propio ta ofresé espasio pa na un manera bon siña i usa hulandes, ingles i spañó.
18 di yanüari 2023 a stipulá e maneho di idioma insular aki. Den e maneho, papiamentu tin e ròl di idioma matris. Esaki ta nifiká ku papiamentu ta e idioma ku ta sirbi komo base pa desaroyo multilingual na Boneiru. Papiamentu ta lenga materno di e parti mas grandi di poblashon i ta e di dos idioma pa un parti grandi di poblashon tambe.
Rekonosiendo papiamentu komo idioma matris, e maneho ta konektá ku e situashon di multilingualismo na Boneiru. E idioma ta forma un base komun riba kua habitantenan di diferente orígen lingwístiko por topa otro i riba kua mas desaroyo di idioma por tuma lugá.
P’esei e maneho di idioma ta dirigí su mes riba konservashon, fortalesimentu i desaroyo di papiamentu, kombiná ku siñamentu i uso di otro idioma. Ta mira multilingwismo komo un forsa: residentenan por mantené nan propio idioma i identidat i mes momentu partisipá na un komunidat den kua mas idioma ta hunga un ròl importante.
