Ku komienso di temporada di áwaseru, e kantidat di sangura ku ta transmití dengue, zika i chikungunya tambe ta oumentá. Banda di esaki nan a mèldu hopi kaso di chikungunya den nos region e aña akí. Pa e motibu akí GGD Bonaire / Salubridat Públiko ta pidi habitantenan pa ta èkstra alertá i pa tuma medida pa kombatí sangura. Pa medio di eliminá lugá di brui, bo ta prevení ku sangura por reprodusí. Di e manera akí bo ta yuda kombatí plamamentu di dengue, zika i chikungunya.
Kontrolá bo kurá tur siman
Durante temporada di áwaseru, kana tur siman den bo kurá. Basha awa afó for di tur hèmber, skalchi pa pòchi di mata i otro ophetonan ku ta kontené awa di yobida ku ta para ketu, i warda nan. Tapa barí i baki di awa bon. Asina bo ta evitá ku e sangura di dengue (Aedes Aegypti) ta pone webu aden.
Paga prinsipalmente tinu riba tayer bieu, baki di plèstik, hèmber, bòter i skalchi bou di pòchi di mata. Bo ta warda awa di yobida? E ora ei sera e barí òf baki bon ku un tapa, òf ku un paña òf skrin kontra sangura ku bo ta hala sera bon steif.
Protehá bo mes kontra piká di sangura
E sangura di dengue ta pika durante dia i prinsipalmente mainta tempran i atardi lat e ta aktivo. Bo por protehá bo mes di e siguiente maneranan:
- Usa un produkto pa spùit (spray) òf pa hunta krema (lotion) ku ta kore ku sangura i ku ta kontené DEET.
- Bisti paña koló kla ku ta tapa bo kurpa bon, manera karson largu i kamisa/blusa ku manga largu.
- Usa skrin pa tene sangura pafó di bo kas. Si ta nesesario, drumi bou di un mosketero.
Atenshon èkstra pa chikungunya
GGD Bonaire / Salubridat Públiko ta èkstra alertá pa un posibel brote di chikungunya. Bo ta biaha pa un isla òf pais kaminda tin chikungunya? E ora ei protehá bo mes èkstra bon kontra piká di sangura.
Bo ta haña doló diripiente den bo skarnirnan òf den bo múskulonan? E ora ei tuma kontakto ku bo dòkter di kas.
Mas tep i konseho
Bo tin pregunta tokante tratamentu di un renbak òf barí di awa? Yama GGD Bonaire / Salubridat Públiko via 715-5324. Mas tep i kontesta riba preguntanan frekuentemente hasí bo ta haña riba ggdbonaire.com/sangura



