Henter aña, GGD Bonaire / Salubridat Públiko ta vigilá kua malesa kontagioso tin na nos isla. Kada kuartal nos ta duna un aktualisashon kòrtiku. Asina tur hende ta keda na haltura di loke ta sosodé i kiko bo mes por hasi pa keda salú.
Barku
Mundialmente, tur barku mester yena un deklarashon di salú promé ku nan drenta haf. Riba esaki ta indiká si tin hende malu na bordo. Sin tin hende ku un malesa kontagioso na bordo, ta informá GGD Bonaire / Salubridat Públiko. GGD Bonaire / Salubridat Públiko ta evaluá e situashon i si ta nesesario duna e barku konseho.
Personanan ku na e momentu ei tin un malesa kontagioso, no por baha. Segun lei internashonal, en prinsipio un barku por mara. Solamente den situashonnan eksepshonal, por ehèmpel ora tin hopi hende malu na bordo òf tin un malesa kontagioso hopi grave, por disidí ku ningun hende no ta desembarká. Pero den práktika kasi nunka esaki no ta sosodé.
Den e di tres kuartal di 2026 (Q3), GGD Bonaire / Salubridat Públiko a risibí deklarashon di salú di 24 barku (krusero). Esaki tabata ménos ku den Q2 (39) i Q1 (83). E kantidat di hende malu na bordo tabata bou den mayoria barku krusero. Afortunadamente na yüli, ougùstùs i sèptèmber (Q3) tampoko no tabatin brote importante riba barku (krusero) den e region karibense.
Síntomanan di grip & fèrkout
E kantidat di hende ku den Q3 a bai dòkter di kas ku síntoma di grip òf fèrkout, tabata mas abou ku den mesun periodo na 2021-2025. Ta posibel ku ménos hende ta bai nan dòkter di kas ku e síntomanan akí, loke ta duna un bista leve di e aña akí. Na laboratorionan nos a mira debésenkuando den Q3 e vírùs di Rhino/Enterovirus (un vírùs di fèrkout) i SARS-CoV-2 (COVID-19). Pero e kantidatnan ei tabata abou.
Na Boneiru nos no ta mira Influenza. Pa algun siman kaba, na Aruba tin Influenza (lesa aki mas). Na Hulanda Europeo no tin un epidemia di grip ainda (Echo i sifra grip | RIVM).
Fin di òktober ta ofresé e bakuna kontra grip i e bakunashon buster kontra COVID-19 na Boneiru. Esaki ta un kolaborashon entre GGD Bonaire / Salubridat Públiko i e ofisinanan di dòkter di kas. Personanan di 60 aña i mas ta risibí pa esaki un karta di invitashon personal. Ademas ta dediká atenshon via medionan sosial i prensa lokal na e kampaña di bakunashon.
Ora di konsulta salú seksual
E ora di konsulta pa salú seksual di GGD Bonaire / Salubridat Públiko ta eksistí for di òktober 2025. E ora di konsulta akí ta pa tur hende ku tin pregunta tokante amor, sèks, relashon, antikonsepshon òf mst (malesanan seksualmente transmití). E ora di konsulta ta komplementá e kuido eksistente na Boneiru.
Den Q3 enfermeranan a mira 44 kliente di kua a tèst 39 pa mst. Esaki ta ménos kliente ku den Q2 (53 kliente, di kua a tèst 45), pero mas ku den Q1 (31 kliente, di kua a tèst 27). Na tur a tèst e aña akí 110 kliente, di kua 22 kliente tabatin klamidia, 12 kliente drep i 1 kliente sífilis.
Malesanan transmití pa sangura
Den e lunanan yüli te ku sèptèmber (Q3), poko hende a bai dòkter di kas ku síntomanan di malesa transmití pa sangura, manera dengue òf chikungunya. E último lunanan tabatin solamente algun kaso di dengue.
GGD Bonaire / Salubridat Públiko ta pidi tur hende pa paga bon tinu riba posibel kriadero di sangura rònt di nan kas. Na Boneiru, sangura por transmití tambe otro malesa ku no ta dengue, manera chikungunya.
Ultimo tempu a registrá brote di chikungunya na vários pais den region: Guyana Franses, Nicaragua, Brazil, Costa Rica i Guadeloupe. For di basta tempu Cuba tin un brote di malesa transmití pa sangura; ademas di chikungunya, e pais tin hopi kaso di dengue tambe. Tambe na Florida, Costa Rica (DENV-1 I DENV-3), El Salvador i Peru, ta registrá e último periodo hopi kaso (lokal) di dengue.
Konsulta pa biahero
Ultimo tempu na vários pais tin brote di sarampi: na Estadonan UnÍ (New York & Pennsylvania), Perú, Mexico, Guatemala, Honduras, Belize, i Suráfrika. GGD Bonaire / Salubridat Públiko ta sigui e situashon den region di aserka. Muchanan na Boneiru ta haña via e programa di bakunashon di Reino, un bakuna kontra sarampi (kachete, sarampi, rubèla). Ta rekomendá bakunashon na biaheronan ku a nase for di 1965 i ku no a yega di haña sarampi òf nunka no a bakuná kontra sarampi. Ta rekomendá bakunashon tambe pa muchanan mas bieu ku 6 luna ku no a haña ainda e bakuna kontra kachete, sarampi i rubèla segun e programa di bakunashon di Reino.
Pa motibu di e brotenan den region i e periodonan di fakansi benidero, GGD Bonaire / Salubridat Públiko ta bolbe rekordá tur hende riba e konsulta pa biahero. Biaheronan por protehá nan mes kontra esaki reglando na tempu konseho di biahe òf bakunashon via GGD Bonaire / Salubridat Públiko.
Den Q3, GGD Bonaire / Salubridat Públiko a mira 178 biahero durante konsultanan, kompará ku 124 biahero den Q1 i 201 biahero den Q2. Den lunanan yüli, ougùstùs i sèptèmber tabata trata prinsipalmente di biaheronan pa Colombia, Brazil, Vietnam, Kòrsou i Panama. Mayoria biahero a risibí un bakuna kontra kentura hel, hepatítis A òf otro malesa kontagioso.
Pa mas informashon i pa traha un sita pa e konsulta, yama (+599) 715 5324 òf meil IZB@bonairegov.com.
Doló di barika
Den Q3 hopi hende a bai dòkter di kas ku doló di barika, meskos ku den e lunanan anterior. For di fin di ougùstùs, e kantidat di pashènt ku ta bai dòkter di kas ta mas ku e nivel sperá pa e periodo akí di aña.
GGD Bonaire / Salubridat Públiko ta konsehá tur hende pa pone atenshon na bon higiena ora ta prepará kuminda i kome. Bon higiena i siguridat di kuminda ta redusí e chèns pa haña doló di barika. Tambe despues di kontakto ku bestia, bon higiena di man ta importante pa redusí e riesgo di vários infekshon.