Entrante 1 di novèmber 2026 a finalisá traspaso di e tim di Kuido di Salú Hubenil for di Sentro Akseso pa GGD Bonaire / Salubridat Públiko di Entidat Públiko Boneiru. Ku esaki Kuido di Salú Hubenil ta kompletamente inkorporá den GGD Bonaire / Salubridat Públiko.
Den e lunanan tras di lomba GGD Bonaire / Salubridat Públiko i Sentro Akseso a traha duru riba preparashon di e traspaso. Nan a hasi palabrashon i pone diferente paso pa sòru ku e empleadonan por a kontinuá bon ku nan trabou den Kuido di Salú Públiko. Durante e traspaso tambe kuido pa mayornan, kuidadónan i hóbennan a sigui tuma lugá.
Kuido di Salú Hubenil ta enfoká riba salú i desaroyo di hende muhé na estado, beibi, mucha i hóben. E servisio ta konsistí di e konsultorio (for di embaraso te 4 aña), kuido di salú eskolar (4 pa 12 aña), kuido di adolesente (12 aña bai ariba) i ehekushon di e Programa di Reino pa Bakunashon.
Mesun kuido, mesun sitionan
Pa mayornan, kuidadónan i hóbennan nada no ta kambia. Nan por sigui konta ku e kuido di kustumber. Por lo pronto e konsultorio ta keda situá den e edifisio di Sentro Akseso na Kaya Prinses Marie 7. E timnan pa kuido di salú eskolar i kuido di adolesente ta sigui traha for di e skolnan na Boneiru.
Fase nobo pa Kuido di Salú Hubenil
Ku e finalisashon, un fase nobo ta kuminsá pa Kuido di Salú Hubenil na Boneiru, kaminda konosementu, eksperensia i enbolbimentu di e empleadonan ta forma un base indispensabel pa kontinuashon i desaroyo mas aleu di kuido di salú hubenil na nos isla. GGD Bonaire / Salubridat Públiko ta spera ku huntu ku e koleganan di kustumber di Kuido di Salú Hubenil, nan por sigui konstruí un servisio aksesibel i kualitativo pa tur mucha i hóben na Boneiru.
Informashon di kontakto di Kuido di Salú Hubenil
Pa pregunta òf mas informashon tokante Kuido di Salú Hubenil, mayornan i kuidadónan por tuma kontakto via:
· Konsultorio: +599 701 5256
· Kuido di Salú Eskolar: +599 701 5258
· Kuido di Adolesente: +599 701 5451
· Email: jgz@bonairegov.com
