Gezaghèber John Soliano di Boneiru a reakshoná riba e karta di Eric van der Burg, sekretario di estado di Asuntunan Interno i Relashonnan den Reino. Den su reakshon gezaghèber ta duna atenshon na e preguntanan ku e sekretario di estado a hasi. E ta splika kua ta e pasonan ku Entidat Públiko Boneiru ta tuma pa fortifiká gobernashon i e organisashon públiko. E mensahe ta klarito: nos ta traha, nos ta invertí i huntu Boneiru ta sigui padilanti.
A kompartí preokupashon, trabou ta kontinuá
Gezaghèber Soliano ta referí na su karta di 10 di ougùstùs. Den e karta akí e ta ekspresá su preokupashon tokante e situashon polítiko den lus di e tareanan sosial grandi na nos isla. Na mes momentu gezaghèber ta enfatisá ku e trabou ta sigui ku e mesun intensidat. Ketu bai nos ta pone pasonan konkreto pa atendé ku e tareanan akí. Boneiru su desafionan ta rekerí un gobernashon stabil, pero tambe forsa di ehekushon: plannan mester keda realisá debidamente tambe.
E palabrashonnan den e karta di sekretario di estado Van der Burg ta forma solamente un parti chikitu di e hopi ambishonnan i temanan ku Entidat Públiko Boneiru ta trahando diariamente riba dje.
Un isla den kresementu
Den e añanan tras di lomba Boneiru a krese fuertemente, i e kresementu akí ta kontinuá. Sinembargo kapasidat di Entidat Públiko Boneiru i di otro servisionan no a sigui krese ku e mesun velosidat ei. Pa motibu ku den pasado invershonnan a keda tras, riba diferente tereno di maneho a surgi retraso. Banda di esaki Boneiru su tarea ta mas grandi ku esun di un munisipio regular na Hulanda.
Esaki ta rekerí un sistema nobo di traha, i un kambio asina ta kosta tempu. Pa laga e kambio akí kana kuidadosamente i eksitosamente, gezaghèber ta haña ku ta bon pa apliká enfoke. Pa medio di hasi eskoho pa loke ta trata prioridat, Entidat Públiko Boneiru por dirigí su energia riba loke ta mas nesesario. Di e manera akí por realisá tambe loke ta keda primintí.
Invertí den bon gobernashon
Dualismo tambe mester di tempu pa haña su lugá kompletamente den práktika. Dualismo ta nifiká un repartishon klarito di ròl entre Konseho Insular i Kolegio Ehekutivo. Esaki ta rekerí un kompromiso permanente di tur órgano di gobernashon enbolbí. Segun gezaghèber ya kaba ta invertiendo aktivamente den esaki awor akí, entre otro pa medio di:
- partisipashon na treinennan ku ta na enkargo di diferente organisashon profeshonal;
- revishon di kódigonan di komportashon pa gobernantenan i empleadonan públiko;
- hasi uso di trayektonan pa fortifikashon di e organisashon públiko;
- oumentá resiliensia di e organisashon.
Kolaborashon komo yabi
Den su reakshon, gezaghèber ta deskribí kiko ta pasando na e momentu akí. E ta indiká tambe kua ta e esfuersonan ku ta keda ehersé pa hasi funshonamentu di gobièrnu i di e organisashon públiko mas solidó. Den esaki Soliano ta enfatisá ku kolaborashon ta krusial. Esaki ta konta pa gobièrnu i pa Konseho Insular, pa Entidat Públiko Boneiru i pa Den Haag, i pa e kolaborashon ku komunidat di Boneiru.
“Boneiru ta konfrontando desafionan grandi, pero nos no ta pará nos so den esaki,” segun gezaghèber Soliano. “Nos ta traha tur dia pa logra un gobernashon mas fuerte i un mihó servisio pa nos habitantenan. Esaki ta rekerí tempu, enfoke i prinsipalmente kolaborashon. Mi tin tur konfiansa ku huntu nos ta kana e kaminda akí eksitosamente,”
