Bo ta organisá un evento òf presentashon musikal entre 11 di desèmber 2026 i 10 di yanüari 2027? Òf bo ke bende òf tira vürwèrk den e periodo akí? Entidat Públiko Boneiru ta hasi un yamada riba habitantenan i empresarionan pa entregá nan petishonnan pa pèrmit i notifikashonnan pa mas tardá dia 6 di novèmber 2026.
Esaki ta konta pa pèrmit di evento, pèrmit di büfèt i e pèrmitnan nesesario (pa benta riba kaya) pa bende i tira vürwèrk. Pa medio di entregá petishon na tempu, Entidat Públiko Boneiru por evaluá e aktividatnan planiá i tene kuenta ku òrden públiko i siguridat. No ta tuma petishonnan ku drenta despues di e deadline den tratamentu.
Pèrmit i notifikashon pa presentashon musikal
Pa eventonan públiko i presentashon di gruponan musikal manera gaita, aguinaldo, barí i tambú, un pèrmit ta obligatorio.
Aparte di e pèrmit bo tin ku hasi notifikashon di e presentashon minimalmente dos dia adelantá na departamento di tráfiko di Kuerpo Polisial Hulanda Karibense. Pa presentashon na e kiosko na Plaza Fraternan di Tilburg, un término di notifikashon di minimalmente un siman ta na vigor.
Na e kiosko akí ta pèrmití presentashon solamente riba djadumingu, pafó di e oranan ku tin sakrifisio di misa ta tuma lugá den Misa San Bernardo.
No ta duna pèrmit pa presentashon na e siguiente sitionan:
• Henter Kaya Korona;
• Ons Hoekje na Kaya Avelino J. (Abechi) Cecilia;
• Skina di Kaya L.D. Gerharts i Kaya Lib. Simon Bolivar;
• Skina di Kaya Grandi i Kaya L.D. Gerharts;
• Kaya Nikiboko Nort i Kaya Nikiboko Sùit;
• Kas di Hadrei na Bulevar Miguel Pourier.
Entregá petishon digitalmente
Entregá bo petishon pa pèrmit digitalmente via wèpsait di Entidat Públiko Boneiru. E fecha mas tardá pa entregá petishon ta 6 di novèmber 2026.
Bo ke bende òf tira vürwèrk? E ora ei pidi e pèrmit (pa benta riba kaya) pa mas tardá riba e fecha akí.
Bo ta hasi uso di vürwèrk durante bo evento? E ora ei tuma kontakto adelantá ku Selibon NV tokante e gastunan di limpiesa òf un suma di garantia. Agregá e komprobante di pago na bo petishon pa pèrmit.
Buska pèrmit
Pa mas tardá dia 17 di desèmber 2026 mester buska e pèrmitnan ku pa mas tardá dia 6 di novèmber 2026 bo a hasi petishon pa nan i ku a keda otorgá, na Kaya Industria Pariba 28.
Sin e pérmitnan rekerí, bo ta kometé violashon. E ora ei Entidat Públiko Boneiru òf polis por tuma medida.
Mas informashon
Bo tin pregunta? Tuma kontakto ku departamento di Asuntunan Hurídiko i General di Entidat Públiko Boneiru. Pa pregunta tokante pèrmit di büfèt, bo por tuma kontakto ku Sentro di Kontakto ku Kliente via 715 5330. .
