Tareanan básiko di Salubridat Públiko
Kombatimentu di malesa di infekshon
Den e mundo rònt di nos tin bakteria i vírùs. Sierto di nan ta hasi nos malu. E ora ei nos ta yama esaki un malesa di infekshon. Salubridat Públiko ta yuda ku prevenshon i kombatimentu di malesa di infekshon, manera por ehèmpel dengue, COVID-19 òf sarampi. Salubridat Públiko ta duna konseho na habitantenan, dòkternan (di kas), institutonan di kuido, skolnan, akohidanan pa mucha i Kolegio Ehekutivo.
Bakunashon (pa biahe)
Bo ke biaha na un manera seif? Salubridat Públiko ta ofresé konseho tokante riesgo di salú na e pais ku bo ta bishitá i ta yuda bo ku e bakunashonnan korekto. Banda di esaki Salubridat Públiko ta ofresé bakunashon na hende ku sierto ofishi i bakunashon ku ta duna tur aña den e mesun periodo (bakunashon kontra grip i bakunashon kontra COVID-19).
Ambiente Salú
Salubridat Públiko ta traha riba kreamentu di un ambiente salú pa habitantenan di Boneiru. Esaki por ta trata di por ehèmpel mehorashon di kalidat di aire, suela i awa òf redukshon di molèster di zonido.
Promoshon di Salú
Salubridat Públiko ta traha riba promoshon di un estilo di bida salú, físikamente i mentalmente. Esaki por ta trata di prevenshon di sobrepeso, stimulashon di kome salú, òf enkurashamentu di moveshon. Tambe Salubridat Públiko ta enfoká riba mehorashon di salú mental i salú seksual, i riba prevenshon di adikshon i uso di supstansia.
Maneho i Investigashon
Salubridat Públiko ta yuda ku desaroyo di maneho riba tereno di salubridat den nos region. Nan ta supervisá kuantu biaha tin problema ku salú na nos isla i nan ta hasi uso di e informashon akí pa formulá konseho (maneho), kaminda ta tene kuenta ku nesesidatnan di nos poblashon. Den esaki nan ta traha huntu ku otro organisashonnan pa mehorá salubridat.
Kordinashon di krísis
Salubridat Públiko tin e tarea pa den tempu di krísis trese tur organisashon ku tin di haber ku salubridat i kuido huntu, kordiná nan i atendé konhuntamente ku e krísis. Tambe Salubridat Públiko ta konsehá durante un krísis riba nivel atministrativo tokante aserkamentu di e krísis na interes di salubridat públiko.
