Aktividatnan di Salubridat Públiko

Ora di konsulta pa biahero

E ora di konsulta pa biahero ta intenshoná pa tur hende ku ta biaha pa eksterior i ku ke prepará nan mes bon pa sierto riesgonan di salú. Durante e ora di konsulta bo ta haña konseho personal tokante bakunashon, prevenshon di malaria i otro medidanan ku ta kuadra ku bo destinashon di biahe, durashon di bo estadia i bo situashon di salú. Bo por akudí na e ora di konsulta tambe pa aktualisá bo bakunashonnan, manere kentura hel, DTP òf hepatítis, i pa un konseho general di salú ora di hasi biahe leu. E meta ta pa laga biaheronan biaha na un manera seif i salú, bon protehá kontra kualke malesa ku tin den otro paisnan. E konsulta ta solamente ku sita via (+599) 715 5324 òf por manda un email na IZB@bonairegov.com.

Ora di konsulta di salú seksual

E ora di konsulta akí ta pa tur hende ku tin pregunta tokante amor, sèks, antikonsepshon òf soa (malesa transmití seksualmente). E ora di konsulta ta intenshoná pa tur hende ku tin mester di informashon òf yudansa. E enfermera- i enfermeronan ta papia papiamentu, hulandes, ingles i spañó. Tambe bo por hasi un tèst di SOA grátis i anónimo. Pa pregunta òf pa traha un sita, yama òf manda un whatsapp na (+599) 790 7373.

Bakunashon kontra grip i COVID-19

Tur aña tin un ròndu di pasa angua, mayoria biaha den luna di òktober i novèmber, pa duna hende protekshon èkstra kontra grip i COVID-19. Durante e ròndu di pasa angua akí hende di den grupo di riesgo, manera hende grandi i hende ku un resistensia redusí, por pasa angua kontra tur dos e vírùsnan. E bakunanan ta yuda prevení malesa grave i hospitalisashon, prinsipalmente den temporada di grip ora ta topa mas tantu biaha ku e infekshonnan akí. Por pasa tur dos angua na mes momentu, mayoria biaha unu den kada brasa. E bakunashon ta grátis pa e gruponan di enfoke i e ta yuda pa mantené bo mes i e hendenan rònt di bo salú.

Hubentut salú, futuro salú

Un ambiente salú na skol, na akohida pa mucha òf den bario ta kontribuí na un hubentut salú i un futuro salú. Pa e motibu akí nos ta stimulá eskoho salú serka nos muchanan.

Na skol ta ofresé e alumnonan fruta i ta stimulá nan pa bebe awa. Kada plenchi na skol tin un fasilidat pa bebe awa, i e alumnonan ta bebe for di nan propio Blue Bottle. Na akohida pa mucha nan ta stimulá e muchanan pa kome salú, bebe awa i move. Den bario i na fèlt di deporte tin fasilidat pa bebe awa. Di e manera akí nos ta hasi komportashon salú algu normal! Bo tin pregunta òf bo ke mas informashon, e ora ei bo por manda un email na bonsaluggd@bonairegov.com. 

Greenkidz

Greenkidz Boneiru ta un inisiativa edukativo ku ta derivá for di e programa di prevenshon di sangura Greenkidz Kòrsou. E ta enfoká riba mucha di 8 pa 12 aña i e tin komo meta pa siña nan kon nan mes por kontribuí na prevenshon di lugá di brui pa sangura i na protekshon di nan propio salú. Ta trata di seshonnan edukativo interaktivo i kreativo, ku ta na enkargo di e Tim di Vector di Salubridat Públiko. E seshonnan ta kombiná teoria ku práktika: pa medio di ehersisio, wega i demonstrashon e muchanan ta deskubrí mas tokante anatomia di e sanguranan (Aedes aegypti), nan siklo di bida, e sitionan kaminda sangura ta brui i hopi mas. Na un manera dibertido i edukativo nan ta siña kon importante un ambiente di biba limpi i salú ta pa tur hende.

Informashon seksual

Seksualidat ta un parti normal di nos bida, pero hopi biaha ta difísil pa papia tokante esaki. Pa e motibu akí Salubridat Públiko ku duna nos muchanan i hóbennan informashon konfiabel ku ta kuadra ku nan edat. Asina na un manera seif i respetuoso nan ta siña anda ku nan mes i ku otronan. E informashon akí ta intenshoná pa siña, no pa enkurashá.

Salubridat Públiko ta yuda dosentenan i dunadónan di ayudo ku dunamentu di lès tokante amor, relashon i seksualidat. Ta trata akí di tópikonan manera rèspèt, pèrmit di otro, konfiansa propio,  antikonsepshon i prevenshon di malesa transmití seksualmente (soa). Si bo tin pregunta òf bo ke mas informashon, e ora ei bo por manda un email na resilensiaggd@boaniregov.com.