Bon higiena ta importante pa salú di tur hende na Boneiru. Siguiendo bon reglanan di higiena, bo ta prevení ku malesanan por plama. E reglanan akí ta konta pa habitantenan, negoshinan i organisashonnan.
Bo ta mira un situashon ku no ta higiéniko? Notifik’é na Direktorado di Supervishon i Mantenshon di lei.
Kiko e produkto òf servisio aki ta nifiká?
Higiena ta tur loke bo ta hasi pa no bira malu. Reglanan di higiena ta yuda prevení malesanan kontagioso. Ta importante ku tur hende ta tene nan mes na e reglanan akí.
Reglanan di higiena ta importante na diferente lugá, manera kas, na trabou, na skol i den negoshi.
Tin sinku área importante di higiena.
1. Higiena personal
Higiena personal ta kuminsá ku laba bo mannan bon. Tuma tempu pa hasi esaki. Usa habon i seka bo man ku papel ku bo ta benta afó despues. Preferiblemente no usa un sèrbètè ku mas hende ta usa.
2. Higiena di espasio i material
Espasio i material mester ta limpi. Pensa riba porta, baño, mesa i material den kushina, manera kuchú i tabla di kòrta. Mester limpia esakinan bon i den sierto kaso desinfektá nan tambe. Hopi biaha espasionan ku mosaiko riba flur i kontra muraya ta mas fásil pa mantené limpi.
3. Higiena di kuminda
Higiena ta importante tambe ora ta trata di kuminda i bebida. Esaki ta konta por ehèmpel pa restorant, skol i akohida pa mucha. Ta importante pa transportá kuminda na un forma limpi, por ehèmpel den bakinan di plèstik limpi. Ora risibí e kuminda, mester kontrol’é. Despues mester laba, repartí i fria e kuminda bon.
4. Higiena den negoshi i hòspital
Den negoshi i hòspital ta konta reglanan mas estrikto mayoria biaha. Esaki ta e kaso den un hòspital manera Fundashon Mariadal. Den espasionan manera un sala di operashon, empleadonan mester traha masha limpi i kouteloso.
5. Higiena públiko
Higiena públiko ta trata di higiena den besindario. Pensa riba sushi, kònteiner fis, awa shushi, berpùt ku ta basha afó òf plaga manera djaka serka di haf. Situashonnan asina por forma un riesgo pa salú.
Tin un grupo di hende tambe ku ta mas vulnerabel pa malesa. E grupo akí yama e grupo YOPI: Young, Old, Pregnant and Infant. Esakinan ta hóben, persona di edat avansá, hende muhé na estado i beibi. Ta importante pa pone èkstra atenshon na higiena pa e grupo akí.
Kada habitante por yuda. Bo por siñalá bo famia, amigunan i bisiñanan tambe tokante e importansia di higiena.
Kon bo por pidi esaki?
Bo ta mira un situashon ku no ta higiéniko na Boneiru? E ora ei bo por notifik’é na Direktorado di Supervishon i Mantenshon di lei.
Bo por hasi e notifikashon via e-mail: bisami_th@bonairegov.com òf telefónikamente: +599 790 0707.
Direktorado di Supervishon i Mantenshon di lei lo studia e notifikashon i por hasi un kontrol. Bo lo risibí mensahe tokante kiko a pasa ku bo notifikashon.
Ku ken bo por tuma kontakto?
Direktorado di Supervishon i Mantenshon di Lei (T&H)
Adrès: Kaya Grandi 56-58
Telefòn: (+599) 790 0707
E-mail: bisami_th@bonairegov.com
Orario di servisio
Djaluna te ku djabièrnè: 8:00 - 16:00 or
Kiko nos ta hasi ku bo datonan personal?
Si bo entregá un petishon òf mèldu algu, Entidat Públiko Boneiru mester di bo dato personal. Entidat Públiko Boneiru ta atendé bo datonan di forma konfidensial.
Den e Lei Protekshon di dato personal BES tin skirbí kon Entidat Públiko Boneiru mester hasi esaki.
E reglanan mas prinsipal ta :
- Entidat Públiko Boneiru ta pidi solamente dato ku mester pa por atendé ku bo petishon òf pa atendé ku loke bo a mèldu.
- Nan ta registrá i prosesá bo datonan di forma seif, konfidenshal i kouteloso.
- Ta usa bo datonan solamente pa e petishon òf loke bo a mèldu, òf pa algu ku tin direktamente di aber ku esei.
- No ta warda bo datonan mas largu di loke ta nesesario pa e petishon òf loke bo a mèldu.
- Otro organisashon ta haña bo datonan solamente si esei mester segun lei.
- Bo por puntra pa kua fin ta usa bo datonan i kiko ta hasi ku nan.
