Bo a kumpra kuminda ku tin un etikèt ku no ta kuadra? Òf bo ta mira produkto den un tienda ku tin un etikèt ku ta falta informashon òf ku ta robes? E ora ei bo por mèldu na Direktorado di Supervishon i Mantenshon di lei. Asina bo ta yuda mehorá seguridat di alimento na Boneiru.
Kiko e produkto òf servisio aki ta nifiká?
Un etikèt riba kuminda ku ta robes òf ku no ta kompleto por forma un riesgo pa bo salú. P’esei bo mester mèldu na Direktorado di Supervishon i Mantenshon di lei.
Pone etikèt robes riba kuminda ta nifiká ku informashon ku ta obligatorio no ta korekto poné riba e etikèt. Esaki por trata por ehèmpel, di:
- ingrediente
- alérgeno
- fecha di vensementu
- orígen di e produkto
- balor nutritivo
Un etikèt robes, por ta engañoso òf e informashon no ta kla. Esaki por krea riesgo pa salú di konsumidónan.
Segun e ‘Dekreto di pone etikèt riba komestibel BES, un etikèt mester tin entre otro e siguiente informashon:
- un lista ku ingrediente
- e kantidat di un ingrediente òf grupo di ingrediente
- e kantidat neto
- e fecha di balides mínimo òf e fecha último ku por konsumí
- informashon tokante manera di warda i uso
- dato di e produktor i importadó
- lugá di orígen
- porsentahe di alkohòl (si esaki ta aplikabel)
- E partido di produkshon
- un indikashon si a usa gas pa empaketá
Kon bo por pidi esaki?
Bo por manda bo notifikashon via e-mail na Direktorado di Supervishon i Mantenshon di lei: bisami_th@bonairegov.com
Deskribí mas kla posibel den bo notifikashon:
- di kua produkto ta trata
- na unda bo a kumpra e produkto
- kiko no ta korekto riba e etikèt
Despues Direktorado di Supervishon i Mantenshon di lei por hasi investigashon.
Ku ken bo por tuma kontakto?
Direktorado di Supervishon i Mantenshon di lei
Adrès: Kaya Grandi 56–58
Telefòn: (+599) 790 0707 (Mèldu)
E-mail: bisami_th@bonairegov.com
Orario di servisio
Djaluna te ku djabièrnè: 08:00 – 16:00
Kiko nos ta hasi ku bo datonan personal?
Ora bo hasi un petishon òf un notifikashon, entidat públiko Boneiru tin mester di bo datonan personal. Entidat públiko Boneiru ta anda kuidadosamente ku bo datonan.
Den e Lei di Protekshon di Datonan Personal BES tin pará kon entidat públiko Boneiru tin ku hasi esaki.
E reglanan mas prinsipal ta:
- Entidat públiko Boneiru ta pidi solamente e datonan ku ta nesesario pa tratamentu di bo petishon òf notifikashon.
- Nan ta registrá i prosesá bo datonan na un manera seif, konfiabel i kuidadoso.
- Nan ta usa bo datonan solamente pa e petishon òf e notifikashon, òf pa algu ku tin direktamente di haber ku esei.
- Nan no ta warda bo datonan mas tantu tempu ku ta nesesario pa e petishon òf notifikashon.
- Otro organisashonnan ta haña bo datonan solamente si esaki ta obligatorio segun lei.
- Bo tin mag di puntra pakiko nan ta usa bo datonan i kiko ta pasa ku nan.
