Pasport

Un pasport ta un dokumentu di biahe i un prueba di identidat. Konforme Lei di obligashon di identifikashon BES - Wet identificatieplicht BES – tur hende mas grandi ku 12 aña ta obligá pa por mustra un prueba di identidat. Pa un pasport bo tin ku bai Registro Sivil dos biaha: un biaha pa hasi e petishon i un biaha pa busk’é.

Pa hasi petishon pa e pasport i pa busk’é bo tin ku traha un sita. Ta otorgá pasport na personanan ku tin nashonalidat hulandes. Un pasport pa personanan di 18 aña bai ariba ta bálido pa 10 aña. Pa personanan te ku 18 aña e pasport ta bálido pa 5 aña. Semper mester hasi petishon pa pasport personalmente. Pues esaki ta konta pa mucha tambe. Bo por regla petishon pa un pasport pa medio di traha un sita online òf telefónikamente via +599 715 5315.  

Kiko mester trese ora di hasi petishon pa pasport

Bai bo sita ku lo siguiente:

• un pasfoto di koló di bon kalidat i ku ta parse bo bon. Wak riba rijksoverheid.nl pa e instrukshonnan. Konforme e instrukshonnan nobo e potrèt no mag di ta mas bieu ku 6 luna;
• tur e dokumentunan di biahe ku bo tin den bo poseshon, pues e dokumentunan bieu ku a kaduká tambe. Un otro prueba di identidat bálido (sédula òf reibeweis) si bo no tin un dokumentu di biahe ‘bieu’;
• si e persona ku ta hasi petishon ta bou di kuratela, e kurátòr mester duna pèrmit (por eskrito). Ora ku e kurátòr a duna pèrmit, mester entregá tambe (un kopia di) su prueba di identidat bálido;
• pago ta tuma lugá na momentu di hasi petishon.

Pa mas informashon tokante outoridat paternal bo por wak riba www.rijksoverheid.nl.

Pasport komersial

Bo ta biaha hopi? E ora ei bo por hasi petishon pa un pasport komersial. E pasport aki tin 66 enbes di 34 página.

Buska bo pasport

Por pasa buska bo pasport tres siman despues ku bo a hasi petishon.

Bo pasport a pèrdè òf nan a hòrt’é

• Bo por hasi petishon mesora pa un pasport nobo.Huntu ku e petishon bo ta firma un Deklarashon di desaparishon na Registro Sivil.
• Bo a haña bo pasport bieu bèk? E ora ei entreg’é na Registro Sivil. Esaki pasobra e pasport aki no ta bálido mas.
• Bo a pèrdè bo pasport den eksterior? E ora ei hasi denunsia na polis lokal kaminda bo ta.

Bishita na kas

Por ta ku pa motibu di un limitashon físiko bo no por bin Registro Sivil pa e petishon pa bo dokumentu di identifikashon. Den e kaso ei bo por pidi pa un bishita na kas. Promé ku e bishita na kas tuma lugá, bo tin ku hasi un petishon na Registro Sivil. Si bo ta bin na remarke pa e servisio na kas, e ora ei segun sita un empleado di Registro Sivil ta pasa serka bo pa regla bo petishon pa bo dokumentu di identidat.

Biaha pa eksterior

Sierto paisnan ta pone eksigensia pa loke ta trata e periodo di balides na momentu ku bo drenta e pais òf na salida. Por ehèmpel na momentu di drenta e pais bo pasport mester ta por lo ménos algun luna bálido ainda. Pidi  informashon tokante esaki serka bo agensia di biahe, na embahada òf na konsulado di e pais di bo destinashon i e paisnan ku bo ta biaha atraves di nan. No solamente ora di hasi petishon, pero tambe ora ku un solo mayor / persona ku outoridat ta biaha ku un yu menor di edat (bou di 18 aña) bo tin mester di pèrmit di e mayor ku outoridat paternal. Lesa si bo tin mester di pèrmit riba www.rijksoverheid.nl.  

Biaha ku yu

Bo ta biaha ku bo yunan pa eksterior i bo tin un otro fam ku nan? E ora ei bo tin mester di un prueba ku bo ta e tata òf mama, òf ku bo tin outoridat paternal.

Pasport di emergensia i laissez-passer

Bo no tin un dokumentu di biahe bálido i tòg bo tin ku biaha? E ora ei den kasonan spesial bo por hasi petishon pa un pasport di emergensia. Bo tin ku kumpli ku sierto kondishonnan sí e ora ei. I bo tin mester di prueba. Por ehèmpel bo tin ku proba ku bo no por posponé bo biahe. E pasaporte di emergensia i e laisser-passer (pèrmit pa pasa) ta dokumentunan temporal di biahe i nan no ta prueba di identidat. Bo por biaha ku de dokumentunan aki por ehèmpel despues di pèrdida, ladronisia òf desaparishon di bo dokumentu regular di biahe.

Bai ku bo dokumentu di emergensia

Ta pidi e persona ku a hasi petishon ku e por mustra dokumentunan a base di kua por proba e urgensia di su biahe. Manera un deklarashon médiko di un spesialista, pasashi i/òf reservashon. Den kaso di fayesimentu di un miembro di famia mester mustra un akta di fayesimentu.

Seguidamente e persona ku ta hasi petishon mester mustra tambe:

• E pasport aktual;
• Un (1) pasfoto;
• Sèdula

Gastu di dokumentu di emergensia

Na aña 2021 e gastunan pa hasi petishon pa un dokumentu di emergensia ta: