Promé habitantenan

Promé habitantenan di Boneiru

Segun e teoria di Jay Haviser, deskribí ekstensamente den su buki  'The First Bonaireans', e promé bonerianonan a bini for di Kòrsou. E promé bonerianonan yama amerindio di tempu arkaiko. E segundo grupo di amerindio (tempu di serámika) a bini hopi mas despues direktamente for di tera firme i a adaptá nan mes na e grupo di tempu arkaiko. E dos gruponan aki a meskla ku otro.

E promé grupo amerindio di tempu arkaiko a krusa laman for di kontinente di Sur Amérika pa Kòrsou masoménos 2500 aña promé ku Kristu. Nan a biba masoménos mil aña na Kòrsou. Despues nan a kuminsá emigrá pa Boneiru. Nan tabata interesá partikularmente den e mondinan di pal’i mangel (mangel tam) riba e isla i e rekursonan natural di alimento relatá na e palunan aki. Asina Haviser ta skirbi den su buki 'The First Bonaireans'.

Arkeólogo Dr. Jay Haviser ta deskribí e hendenan di tempu arkaiko komo un grupo ku tabatin un eksistensia semi-nomádiko. Ku un eksistensia 'semi-nomádiko' e ke men ku nan tabata move di un sitio pa otro pa buska alimento. Nan ta move segun tempu di aña. E amerindionan no tabata konosé agrikultura i tampoko artefakto di serámika. E hendenan aki tabata konsistí di un grupo di famia egalitario chikitu di ménos ku 100 persona. E amerindionan ku a biba riba Boneiru den tempu prehistóriko, tambe den tempu di yegada di spañónan, tabata di un nivel kultural hopi abou. Ora ku e amerindionan di tempu serámika a yega direktamente for di tera firme, e nivel a subi un tiki, den sentido nan a bini ku e téknika pa traha artefakto di serámika i tambe plantamentu, pues agrikultura i hortikultura.

E amerindionan aki tabata usa e idioma arowak pa komuniká ku otro. Den idioma papiamentu ainda por topa ku palabranan arowak prinsipalmente den flora, founa i topografia. Por ehèmpel:

  • Flora: wayaká, kardidaki, watapana, koubati, stanibari, kadushi, yatu, kamari etc.
  • Founa: patrushi, totolika, yiwiri, warawara, kinikini, gatu, dawari, mahawa etc.
  • Topografia: Onima, Koumati, Wekuwa, Warahama, Wanapa, Gurubú, Wamari etc.

'Indjannan' kòrá: e poblashon indígeno di Boneiru

Den historia oral di Nort di Saliña - (Kunuku Bieu) tin un storia ku kada bes ta lanta kabes. Hende grandinan dje bario a bisa ku nan a tende di nan grandinan i nan grandinan a tende di nán grandinan ku hopi aña pasá un grupo di indígeno di Nort Amérika a bin biba den nan bario. E habitantenan di Nort di Saliña, Kunuku Bieu, ta hopi orguyoso di nan rais amerindio (indígeno). Por mira karakterístikanan indígeno tambe den kara di algun di nan, nanishi un tiki doblá, kabei i asta den nan aktitut i karakter. Na muraya di hopi kas den Nort di Saliña por mira un kabes di un 'indjan'. Un persona indígeno. Mirando e plumanan i trahe por bisa ku ta un indígeno norteamerikano. Asta por bisa ku ta un kasike.

Den Nort di Saliña por topa tambe ku nòmbernan di kaya ku ta referí na tribunan indígeno di Nort Amérika. Interesante ta ku tin hopi indikashon ku tin un relashon entre Nort di Saliña i e área di New York, Estádos Unídos.

Pader Nooyen, historiadó i arkeólogo (amatùr), a skirbi di e indígenonan kòrá. Esaki ta un grupo di hendenan indígeno ku a keda deportá pa Boneiru na 1660, debí na problemanan ku tabatin kada bes entre e poblashon indígeno den e teritorio di Esopus. E teritorio di Esopus ta keda den e área kaminda New York ta aworaki. Hulanda a kolonisá e área i a funda Nieuw Nederland, ku komo sentro Nieuw Amsterdam.

Na 1636 hulandesnan a okupá Boneiru. Esaki a pasa dos aña despues di e okupashon di Kòrsou. Nan a okupá tambe e teritorio merikano menshoná ariba na 1606. Na 1647 Peter Suyvesant a establesé den e teritorio di Nieuw Nederland - Nieuw (New) Amsterdam.

Nooyen den su buki ‘Isla Papa Cornes’ ta referí na loke e ta yama 'rumor', esta ku a trasladá algun hendenan indígeno for di e teritorio merikano di Nieuw Nederland pa Boneiru na 1660. E hendenan indígeno en kestion lo a bini Kòrsou promé, despues trasladá pa Boneiru, na unda nan a keda biba pa e restu di nan bida.

Deportashon

Na aña 1659 a surgi un guera na e riu Hudson, banda di New York, entre e poblashon indígeno di e region ei i kolonistanan oropeo.
Un dia algun hende indígeno tabata baña den e riu Hudson, ora ku algun kolonista oropeo a tira ku skopèt riba nan. Esaki ta orígen di e traslado di e indígenonan di Merka pa Boneiru.  

Komo un akto di vengansa e poblashon indígeno a ataká un pueblo chikí na unda e oropeonan tabata biba, un área yamá Esopus. Esaki tabata na aña 1660. Peter Stuyvesant, gobernador di New Amsterdam, a deklará e poblashon indígeno en kestion guera i a kore ku nan for di e pueblo. Nan a kima henter e pueblo di Esopus, den e pueblo Wiltwyck a kima 12 kas, a mata 21 hulandes i a tuma 45 presu. E guera di Esopus aki a terminá te na aña 1664.

Pa medio di intermediashon di e mohikano a logra terminá e guera aki. Stuyvesant e ora ei, na luna di mei 1660, lo a manda 11 di e kasikenan rebelde aki Kòrsou i via Kòrsou pa Boneiru, kaminda nan lo mester a yuda den e trabou di salu, huntu ku e afrikanonan sklabisá.

Pregunta

Pregunta ta ku si e echo aki ta kuadra ku realidat? Bèrdat ta ku tin 11 hendenan indígeno di Merka a bin biba na Boneiru na aña 1660? Nooyen ta mustra ku no tin niun anotashon hañá den dokumentonan históriko ku si enbèrdat Boneiru a haña un grupo di indígeno norteamerikano.

Den pasado New York tabata yama New Amsterdam. Den un buki riba historia di New York skirbí pa Breadhead (History of the State New York), e ta konta ku enbèrdat e hendenan indígeno aki a bai for di e teritorio ei. E ta skirbi entre otro: “E rumannan kòrá no a lubidá nan rumannan presu i nan tin rabia riba e hulandesnan”. Pero Breadhead no ta konta ku nan a bai Boneiru, ni Kòrsou. Nooyen a konsiderá ku e rumornan tokante binimentu di e 'indjannan' di Esopus aki Boneiru ta keda hopi dudoso.

Johan Hartog, otro historiadó ku a skirbi di Boneiru, tambe ta elaborá riba e tópiko aki i ta mustra ku e no a topa ku niun dokumento, den su investigashonnan, pa sostené e ponensia ku si enbèrdat e 'indjannan' di Esopus aki a bini Boneiru.

Albert Bianculli (†), un hòmber merikano ku a biba na Boneiru, a tuma nota di loke Nooyen i Hartog a skirbi den nan respektivo bukinan. El a disidí di bai profundisá mas den e asuntu aki. Kontrario na Nooyen i Hartog, Bianculli por a hasi uso di internèt pa hasi su investigashon. El a bai te asta New York pa hasi investigashon den archivo. Ei el a topa ku 'The Curaçao Papers', ku ta kubri e periodo ku hulandesnan a kolonisá e teritorio merikano ei. Den tempu ku Nooyen i Hartog a hasi nan investigashonnan e archivo di e periodo di hulandesnan na New York no tabata aksesibel pa nan.

Tin otro vershonnan ku ta bisa ku e amerindionan norteamerikano aki a bini na 'Curaçao', pero ku despues a hiba nan bèk nan teritorio.

Orguyo

Echo ta ku habitantenan di Nort di Saliña ta orguyoso di nan desendensia indígeno. Bon mirá nan ta desendiente di un grupo di oropeo i amerindio ku a biba den e bario aki, loke ta sali bon na kla den e aparensia físiko di e norteño di awendia. Tambe, pa loke ta trata e parti oropeo, den famnan manera Thodé, Evertsz, Semeleer, Anthony, Thielman, Boezem i Muller.