Ku orguyo Indebon ta wak bèk riba un edishon sumamente eksitoso di e Weganan Interinsular na Boneiru. E evento a kuminsá ku alegría i ambishon, i a finalisá ku prestashonnan grandi di parti di e islanan i e pais ku a partisipá i nan hòbennan.
E apertura a konosé un momentu históriko i spesial: e islanan ABC, e islanan SSS i Sürnam despues di hopi aña a bini huntu atrobe durante un solo evento deportivo interinsular. E reunifikashon akí a suprayá e forsa di deporte komo faktor konektivo den nos region.
Boneiru tabatin e honor pa organisá pa promé biaha Bich Tènis (skol básiko + skol sekundario), Basketbòl 3x3 (skol básiko + skol sekundario) i Futbòl Cruyff Court (skol básiko mucha muhé) den e Weganan Interinsular.
Resultadonan di Boneiru
Bich Tènis skol básiko
· di dos lugá
· di tres luga
Bich Tènis skol sekundario
· promé lugá
· MVP: Shantely Melaan
Futbòl Cruyff Court skol básiko mucha muhé
· promé lugá
· MVP: Xianeesha Oleana
E prestashonnan akí ta proba e dedikashon, e disiplina i e talento di nos hóbennan boneriano. E evento a finalisá den un ambiente di alegria puru i unidat insular. Despues di algun dia di wega intensivo, e atletanan a meresé un momentu pa selebrá huntu. E Weganan Interinsular no solamente ta brinda nos hóbennan un oportunidat pa presta den deporte, pero tambe pa sera amistat, eksperensiá interkambio kultural i hasi konekshon ku hóbennan di mesun edat di e otro islanan.
Gradisimentu ta bai na tur spònser ku a kontribuí manera FWNB, BWM, WEB NV, Don Andres i Cruyff Court Foundation.
Kiko e siguiente paso ta?
E siguiente edishon di e Weganan Interinsular ta tuma lugá na Kòrsou for di 12 te ku 15 di maart 2026. Einan e siguiente partinan ta riba programa:
· Futbòl Cruyff Court (skol sekundario)
· Ahedres (skol básiko + skol sekundario)
· Vòlibòl (skol sekundario)
· Trèfbal (skol básiko )
Indebon ta anhelá kontinuashon di e kolaborashon interinsular spesial akí i ta deseá Kòrsou hopi éksito ku organisamentu di e siguiente edishon.
