For di 12 te ku 15 di maart 2026 Kòrsou tabata na turno pa ta anfitrion pa e Weganan Interinsular 2026, ku partispashon di Aruba, Boneiru, Kòrsou i Sürnam. Riba programa tabatin e siguiente kompetensianan: trèfbal mucha muhé (skol básiko), ahedres mucha hòmber i mucha muhé (skol básiko i skol sekundario), futbòl mucha hòmber (skol sekundario) i vòlibòl mucha hòmber (skol básiko). Boneiru su resultadonan tabata hopi bunita: den futbòl Cruyff Court pa skol sekundario, Boneiru a sali kampion, den trèfbal pa skol básiko nos mucha muhénan a sali supkampion, i den vólibòl pa skol básiko Boneiru a sali na di 3 lugá. Den ahedres kategoria 2 mucha hòmber, Boneiru a sali na di 3 lugá. I pa loke ta trata e resultado final ‘overall’ di ahedres, Boneiru a sali na di 3 lugá. Ta bon pa menshoná akinan ku Sürnam a duna un bon bataya den kompetensia di ahedres. Esaki ta e promé biaha ku Sürnam ta kompetí den Weganan Interinsular.
Un bon notisia ku a presentá durante e Weganan Interinsular na Kòrsou ta ku a logra un akuerdo entre Johan Cruyff Foundation i IBISA Aruba, Indebon Boneiru i FDDK Korsou pa traha huntu durante e 3 añanan binidero. Meta di e kolaborashon akí ta pa sigui engrandesé e Weganan Eskolar i e Weganan Interinsular, futbòl Cruyff Court i tambe diferente otro tipo di deporte. Riba djasabra 14 di mart 2026 e kolaborashon akí a bira realidat na momentu ku a firma e akuerdo.
E último Weganan Interinsular pa aña 2026 ta tuma lugá dia 26 di mart pa 29 di mart 2026. E biaha akí ta Aruba su turno pa aktua komo anfitrion i e isla akí ta enkargá tambe ku klousura di e Weganan Interinsular 2026. Na Aruba e hóbennan ta bai kompetí e aña akí den e siguiente deportenan: aquathlon mucha muhé i mucha hòmber (skol básiko i skol sekundario), vòlibòl mucha muhé (skol sekundario) i atletismo mucha muhé i mucha hòmber (skol básiko i skol sekundario). Nos hóbennan ta den ful preparashon pa bai saka kara di Boneiru na Aruba.
Entidat Públiko Boneiru, sekshon Indebon ta gradisí Fundashon Wega di Number Boneiru pa su konfiansa i tambe pa e sosten ku nan ta sigui duna na e Weganan Interinsular.
