Kralendijk – Ku un seremonia adaptá a konmemorá esnan ku a pèrdè nan bida durante segundo guera mundial. E seremonia akí a tene lugá den sentro di Kralendijk na e monumento pa esnan ku a fayesé. Debí na e medidanan di Covid19 tabatin un kantidat limitá di hende presente na e seremonia.
E banderanan di Boneiru i Hulanda tabata halfstòk na e monumento. Despues di dos minüt di silensio a pasa pa pone krans. Gezaghebber Rijna i sekretario insular Wendy Pelk a pone un krans na nòmber di Entidat Públiko Boneiru. Despues a sigui representante di reino interino Jan Helmond di parti e Reino. Hefe di kuerpo polisial Rosales, di Kuerpo Polisial Hulanda Karibense huntu ku kapitan Snijders di Koninklijke Marechaussee, huntu a pone krans na e monumento. Miembronan di e organisashon di veteranonan Van Der Linden i Straus a klousurá e parti aki.
Tema di e aña akí ta: ‘despues di 75 aña di libertat’. Tantu gezaghebber Rijna komo representante di reino interino Helmond, a para ketu na e tema. Den nan spich nan a hala un liña di kiko a pasa durante segunda guera mundial i di e libertat ku nos ta disfrutá di dje awendia. Despues di a toka e himnonan di Boneiru i Hulanda a finalisá e seremonia. Tur hende ta spera ku otro aña por selebrá e konmemorashon pa fayesidonan den segunda guera mundial na un forma normal. Sin limitashon di e medidanan di Covid19 aktual. Por mira e seremonia riba e pagina di facebook: https://fb.watch/5hC7eQDbiA/
