Kolegio Ehekutivo a tuma e Desishon Preparatorio Estadia Rekreativo i Konstrukshon di Bibienda riba 2 di desèmber. A base di e desishon preparatorio akí por wanta pèrmit di konstrukshon pa proyektonan indeseá di estadia rekreativo i konstrukshon di bibienda. Ku esaki Kolegio Ehekutivo tin e intenshon pa realisá un mihó ekilibrio riba merkado lokal di bibienda i pa kondusí desaroyonan turístiko den un mihó kaminda. A tuma e desishon ku bista riba preparashon di e revishon total di e Plan di Desaroyo Espasial Boneiru (Ruimtelijk Ontwikkelingsplan Bonaire - ROB).
Konstrukshon di bibienda
E último añanan e preshon riba merkado di bibienda a oumentá enormemente. Un kousa importante ta ku ta trahando un kantidat grandi di bibienda nobo komo di dos bibienda òf bibienda rekreativo. Pa e motibu akí hopi bibienda (nobo) òf parsela no ta disponibel pa personanan ku tin un konekshon sosial òf ekonómiko. Esaki a kondusí na e echo ku preis pa parsela i bibienda, tantu pa loke ta trata hür komo kompra, a subi enormemente. Pa e motibu akí pa hopi habitante no ta posibel mas pa haña alohamentu adekuá.
Kolegio Ehekutivo ta sumamente preokupá tokante esaki. Kolegio Ehekutivo ta haña importante ku tin sufisiente bibienda pagabel pa nos poblashon. P’esei mester duna preferensia na konstrukshon di kas òf apartamentu pa hendenan ku tin nan rais den nos komunidat. E desishon preparatorio akí ta duna espasio pa via e Plan di Desaroyo Espasial Boneiru (ROB) sòru pa e enfoke ta riba oferta balansá, di manera ku tin sufisiente bibienda pa famianan lokal.’
Den e Plan di Desaroyo Espasial Boneiru (ROB) ta inkluí regla pa yega na un strukturashon ekilibrá di e kantidat di bibienda ku tin disponibel. Di e manera ei realmente por desaroyá e áreanan ku ta intenshoná pa konstrukshon di bibienda pa solushoná e nesesidat pa konstrukshon di bibienda lokal.
Estadia rekreativo
Maneho turístiko di Entidat Públiko Boneiru ta enfoká riba un nivel mas haltu di kalidat (minimal 4/5 strea) i un nivel mas haltu di servisio di e fasilidatnan pa estadia rekreativo. Esaki ku e meta pa alsa kalidat di bida pa nos habitantenan i viabilidat di e empresanan turístiko.
Na aña 2017 Entidat Públiko Boneiru a stipulá e Plan Stratégiko pa Turismo. For di esaki den luna di aprel di e aña akí a surgi e Plan di Rekuperashon di Turismo, den kua ta deskribí e direkshon di desaroyo. Boneiru ke profilá su mes komo un destinashon pa turismo di balor kualitativamente haltu, loke lo tradusí su mes den mas oportunidat pa empresarionan lokal i mihó kondishonnan di trabou pa empleadonan boneriano. Nos isla ke enfoká riba atraé turismo di kalidat ku komo meta final un nivel mas haltu (di servisio) dentro di e sektor turístiko, mihó viabilidat pa empresanan, mas empleo pa hendenan lokal, salario mas haltu i un bienestar (hopi) mas mihó pa e poblashon lokal. E maneho pa sektor turístiko ta keda ekspresá den kriterionan espasial, a base di kua por evaluá petishon pa konstrukshon. Ta inkluí e kriterionan akí den e revishon total di e Plan di Desaroyo Espasial Boneiru (ROB).
Kolegio Ehekutivo ta ta haña ku ‘Boneiru ta den un fase di kresementu i último tempu e kresementu akí a bai ku un velosidat hopi haltu. Aunke ku ta kontentu ku kresementu ekonómiko, mester kondusí esaki den bon kaminda sí pa por ta bon sinkronisá ku deseonan i balornan di nos komunidat. Ku e desishon preparatorio nos tin un bon instrumento pa stipulá kuadro- i kriterionan, dentro di kua nos por garantisá un kresementu balansá i kualitativamente bon, ku ta pas den e vishon pa Boneiru. Di un banda esaki lo mehorá nivel di nos produkto turístiko, pero tambe lo krea kondishonnan pa mihó oportunidat i entrada pa tur boneriano.
E desishon preparatorio
Durante e lunanan binidero ta traha riba revishon total di e Plan di Desaroyo Espasial Boneiru (ROB). Sinembargo den e periodo akí desaroyonan por presentá, ku ta en pugna ku e maneho ku ta inkluí den e Plan di Desaroyo Espasial Boneiru (ROB). Ku e Desishon Preparatorio Estadia Rekreativo i Konstrukshon di Bibienda por wanta e tipo di proyektonan akí. Ku esaki por evitá ku den e periodo binidero desaroyonan ta tuma lugá ku ta en pugna ku e maneho ku ta inkluí den e Plan di Desaroyo Espasial Boneiru (ROB). Despues ku e Plan di Desaroyo Espasial Boneiru (ROB) bira irevokabel, por disidí pa duna pèrmit si e inisiativa ta adekuá. Si e ta en pugna ku e maneho, e ta keda rechasá. Segun ekspektativa na kuminsamentu di aña 2022 diseño di e Plan di Desaroyo Espasial Boneiru (ROB) ta disponibel pa tur hende tira bista aden.
E Desishon Preparatorio ta aplikabel pa henter e isla Boneiru, ku eksepshon di Klein Bonaire ku ya kaba ta área protehá.
E Desishon Preparatorio ta drenta n vigor 4 di desèmber 2021. Akí seis luna Entidat Públiko Boneiru ke tin un diseño di e Plan di Desaroyo Espasial Boneiru (ROB) kompletamente kla. Durante 30 dia e Desishon Preparatorio Estadia Rekreativo i Konstrukshon di Bibienda ta disponibel pa tur hende tira bista aden na Direktorado di Planifikashon i Desaroyo i por konsult’é digitalmente tambe riba www.bonaire-ro.nl. Pa pregunta bo por tuma kontakto ku Direktorado di Planifikashon i Desaroyo, emailadrès: directie_ro@bonairegov.com.
