Departamento di Salubridat Públiko a lansa un videoclip pa hóbennan ku splikashon tokante kon mester hasi tèst propio (https://youtu.be/R0tq8anpSp0). Den e clip un hóben ta konta ku dos biaha pa siman e ta hasi un tèst propio pa wak si e por bai skol. For di djamars 22 di mart 2022 ta pasa e clip pa alumnonan di skol avansá mira. Dentro di poko empleadonan di Salubridat Públiko ta bishitá skolnan avansá pa duna mas informashon na e alumnonan.
E empleadonan ta splika e alumnonan kon importante ta pa tene bo mes na e reglanan básiko. E videoclip tokante tèst propio ta forma parti di e kampaña ‘Biba ku COVID-19’. A anulá e medidanan di corona na Boneiru, pero ketu bai e vírùs ta presente na e isla. P’esei ta importante pa protehá hende vulnerabel, manera nos hende grandinan. Por ehèmpel por hasi un tèst propio promé ku un hende bai bishitá un hende grandi.
Alumnonan di skol avansá por protehá nan mes i otronan hasiendo un tèst propio dos biaha pa siman. Asina nan ta evitá ku nan ta bai skol, miéntras nan ta kontagiá i por pega otronan ku e vírùs. For di 16 di febrüari 2022 Salubridat Públiko ta parti tèst propio na skol avansá. E departamento tin sufisiente tèst propio den stòk, di manera ku alumnonan di skol avansá por tèst dos biaha pa siman.
Bo tin keho? E ora ei yama 0800 0800 pa un sita pa hasi tèst. Bo por hasi un tèst propio tambe. Si resultado di e tèst propio ta positivo, e ora ei bo tin ku yama 0800 0800 pa hasi un tèst di PCR. E ora ei bo sa sigur si bo ta kontagiá òf nò.
