Departamento di Salubridat Públiko a anunsiá e siman akí ku a instalá un punto di awa pa muchanan na skol básiko San Luis Beltrán na Rincon. E inisiativa aki ta parti di e esfuerso i plannan mas amplio pa promové salú i bienestar, ku un enfoke spesífiko pa stimulá hábitonan di bebementu saludabel bou di muchanan.
E punto di awa ta diseñá pa duna akseso fasil na awa limpi pa tantu alumnonan komo maestronan. Bòter reusabel di awa tambe lo ta disponibel pa e proyekto aki na tur alumno, maestro, i muchanan di NSO. Di e forma akí a tene kuenta ku sostenibilidat di medio ambiente i a redusí uso di plèstik i karton.
Diputado den Heyer a enfatisá e importansia di e inisiativa i a deklará: "Nos meta ta pa promové estilo di bida saludabel i pa konsientisá e importansia di bebe sufisiente awa. E punto di awa aki ta un paso importante den e direkshon akí i nos tin planiá pa ekstendé e inisiativa aki na otro skolnan na Boneiru. Ademas, nos ta trahando pa introdusí “dianan di awa” semanal. E dianan akí ta e dianan ku ta enkurashá e muchanan pa bebe solamente awa durante dia komo un hábito saludabel, kual otro tipo di bebidanan no ta bon biní na skol."
Durante e konferensia di prensa ku a tuma lugá e siman akí, vários orador, entre otro representante di departamento di Salubridat Públiko i JOGG (Jongeren Op Gezond Gewicht). Durante di e konferensia di prensa a inougurá e promé punto di awa, i tambe a menshoná e benefisionan ku e proyekto tin pa salubridat i medio ambiente.
E punto di awa na Rincon lo tin sosten di programanan edukativo i un kampaña pa promové hábitonan di bebementu saludabel.
