Ku orguyo Kolegio Ehekutivo di Boneiru ta anunsiá ku dia 27 di mei 2025 Konseho Insular a bai di akuerdo ku lantamentu di e Ofisina di Derecho di Siudadano. E lokèt nobo i independiente akí ta bai duna siudadanonan sosten na momentu di para pa nan derechonan den kontakto ku gobièrnu. Ku esaki a pone un paso importante den direkshon di un atministrashon públiko mas honesto, mas transparente i mas hustu na Boneiru.
Hustisia komo derecho básiko
Regularmente habitantenan di Boneiru ta eksperensiá sierto drèmpelnan ora nan ke entregá un keho, hasi opheshon òf bai den apelashon kontra desishonnan di instansianan di gobièrnu. Pa hopi hende e proseso akí ta kompliká, inaksesibel òf asta inalkansabel. ‘Nunka hustisia no mag dependé di ken bo konosé òf kuantu konosementu bo tin’, segun Kolegio Ehekutivo. ‘Ku e ofisina akí nos ke hasi derecho aksesibel pa tur hende – sin tene kuenta ku nan formashon, entrada òf bèkgrount.’
Fásilmente aksesibel i independiente
E Ofisina di Derecho di Siudadano ta ofresé akseso fásil i sin ningun gastu na konseho i sosten hurídiko, ku atenshon spesial pa gruponan vulnerabel. E ofisina ta bai operá kompletamente independiente, sin metementu di polítika òf gobièrnu. Esaki ta garantisá un sitio seif i neutral, kaminda ta skucha siudadanonan i duna nan sosten den nan búskeda pa hustisia.
Kiko e ofisina ta hasi eksaktamente?
E Ofisina di Derecho di Siudadano:
- ta yuda habitantenan ku entregamentu di keho, opheshon i apelashon kontra desishonnan di gobièrnu;
- ta informá siudadanonan tokante nan derechonan i proseduranan hurídiko;
- kaminda ta posibel ta intermediá entre siudadanonan i instansianan di gobièrnu;
- ta señalá puntonan problemátiko struktural den maneho i ehekushon, i ta raportá tokante esakinan na e outoridatnan kompetente.
No ta intenshoná pa kaso penal òf disputa privá
E ofisina ta enfoká únikamente riba disputa entre siudadano i gobièrnu. Kasonan entre dos òf mas siudadano òf kestionnan di lei penal ta kai pafó di e pakete di tarea. Empresanan i otro personanan hurídiko tampoko no por hasi uso di servisio di e Ofisina.
Aserkamentu den fase den direkshon di aña 2026
E implementashon lo kana paso pa paso. Den e promé kuartal a kuminsá ku formulashon di e kuadro di maneho i e finansiamentu. Awor ta sigui pa reklutá personal i drechamentu di e lokètnan. E servisio efektivo ta kuminsá ku un fase piloto den e di tres kuartal di e aña akí. E apertura ofisial i servisio mas amplio ta planiá pa e di kuater kuartal.
Un logro importante pa bon gobernashon
Kolegio Ehekutivo ta aksentuá ku e desaroyo akí ta kuadra ku un ambishon mas amplio pa mehorá servisio públiko na Boneiru i pa hasi nos siudadanonan mas fuerte den nan posishon hurídiko. ‘Konfiansa den gobièrnu ta kuminsá ku e derecho pa ser skuchá. Ku e Ofisina di Derecho di Siudadano nos ta duna e konfiansa akí un base sólido.’
Huntu pa un Boneiru mas hustu
Kolegio Ehekutivo ta gradisí Konseho Insular pa e konfiansa i ta hasi un yamada riba nos siudadanonan pa aworó hasi uso aktivamente di e ofisina, asina ku e bira operashonal. Den e lunanan binidero ta sigui mas informashon tokante e apertura i e servisio.
