E temporada di yobida a kuminsá atrobe i esei ta nifiká ku e chèns pa e malesanan Dengue, Chikungunya i Zika ta oumentá. E departamento di Salubridat Públiko di Entidat Públiko Boneiru ta pidi tur habitante pa tuma medida pa evitá ku e malesanan akí ta plama.
Un tipo di sangura, Aedes aegypty, yamá tambe sangura di Dengue, ta transmití Dengue, Chikungunya i Zika. E sangura aki ta biba prinsipalmente den kas i kurá di hende. E sangura muhé ta pika hende pa por chupa sanger ku e mester pa alimentá su webunan den su kurpa. Despues e ta buska opheto ku awa aden pa pone su webunan. E sangura di Dengue tin un preferensia fuerte pa opheto artifisial ku parti paden lizu i awa kla.
E manera mas efektivo pa prevení Dengue, Chikungunya i Zika ta eliminá tur lugá kaminda sangura por brui. E sangura ta pone su webunan den awa ku ta para ketu, manera den baki di plèstik, tayer di outo, bòter, bleki i hèmber den kua awa ta keda para. Pa e motibu ei, Departamento di Salubridat Públiko ta hasi un yamada na tur hende pa regularmente kontrolá i deshasí di tur opheto ku por kontené awa den i rònt di kas. Bo tin baki òf barí pa kohe áwaseru pa mata òf bestia? Tapa esaki bon sangura. Por ehèmpel por hasi esaki ku un paña òf skrin kontra sangura ku un faha di elastik ku ta span rònt di e parti habrí.
Banda di kombatí kriadero, ta importante ku bo ta evitá ku e sangura di Degue ta pika bo. Durante e temporada di yobida, bisti paña ku ta tapa bo kurpa, usa produkto ku ta kore ku sangura (manera DEET) i tene bo kas liber di sangura usando skrin i eventualmente flit paden di kas. E sangura ku ta plama e malesanan akí ta aktivo durante dia i spesialmente mainta tempran i atardi. P’esei drumi den dia bou di un muskitero.
Departamento di Salubridat Públiko ta informá ku na e momentu akí no tin siñal ainda di sirkulashon di Dengue, Chikungunya òf Zika na Boneiru.
Bo tin mester di konseho òf yudansa ku tratamentu di renbak òf barí di awa? Tuma kontakto ku Sekshon Kontròl di Vektor (Sectie Vector Controle) via 715-5324.
