Den un tempu kòrtiku uso di fètbaik i stèp eléktriko a oumentá konsiderabelmente na Boneiru. Aunke e vehíkulonan akí ta popular serka nos habitantenan i turistanan, uso di esakinan regularmente ta kondusí na situashonnan insigur den tráfiko i na aksidente. Pa e motibu akí e triángulo di siguridat (Entidat Públiko Boneiru, Ministerio Públiko i Kuerpo Polisial Hulanda Karibense) a hasi palabrashonnan tokante regulashon, mantenshon di lei i informashon na públiko, tur esaki den un forma bon komprendibel.
Kua ta e reglanan ku nan ta apliká?
Ta regulá tráfiko na Boneiru hasiendo uso di e Ordenansa di Tráfiko Boneiru 2019. Den e lei akí tin regla tokante kua vehíkulo ta pèrmití i kua ta e eksigensianan ku nan tin ku kumpli kuné. A base di e lei akí ta klasifiká baiskel eléktriko ku sosten di pedal i ku por kore mas duru ku 30 km pa ora, hurídikamente komo bròmfits. Ta konsiderá otro vehíkulonan tambe ku un motor eléktriko i sin sosten di pedal, manera stèpnan eléktriko, komo bròmfits. Esaki ta nifiká ku e siguiente obligashonnan ta na vigor:
- E manehadó mester bisti un hèlm, i e mester ta den posishon di un reibeweis bálido pa e tipo di vehíkulo. Ademas e manehadó mester tin por lo menos 16 aña di edat;
- Tambe e vehíkulo mester tin un number i e mester ta sigurá.
Tambe t’asina ku bròmfitsnan mester kumpli ku sierto eksigensianan tékniko.
Entidat Públiko Boneiru ta investigando e posibilidatnan pa via un adaptashon di e ordenansa di tráfiko, intensifiká e reglanan pa e tipo di vehíkulonan akí den kuadro di siguridat den tráfiko.
Mantenshon di lei
For di promé di yüli 2025, polis ta bai kontrolá aktivamente riba kumplimentu ku e reglanan akí. Pa por determiná velosidat di vehíkulo ophetivamente, ta bai kumpra aparato spesial. Ku esaki por determiná si un vehíkulo por kore mas rápido ku loke lei ta pèrmití pa un baiskel. Vehíkulonan i manehadónan ku no ta kumpli ku e reglanan vigente por konfrontá diferente medida. Por ehèmpel polis por:
- duna un but pa motibu ku no tin un hèlm bistí òf pa korementu sin reibeweis;
- konfiská e vehíkulo si e no ta sigurá òf si e no ta registrá;
- òf den kaso di violashonnan ku ta ripití kada biaha, traha un prosèsverbal ku por tin konsekuensia pa e pèrmit pa kore un vehíkulo (reibeweis).
Yamada na habitantenan i turistanan
Durante e aña tras di lomba, banda di uso di fètbaik i stèp eléktriko, a opservá otro desaroyonan preokupante tambe, manera oumento di uso di alkohòl den tráfiko. Komo konsekuensia di esaki Entidat Públiko Boneiru ta traha huntu ku e triángulo riba un kampaña nobo pa siguridat den tráfiko. E aserkamentu akí ta enfoká riba oumento di siguridat di tráfiko i riba prevenshon di aksidente. Na mes momentu e triángulo ta hasi un yamada riba tur doño i usuario di fètbaik òf stèp eléktriko i tur usuario di kaminda pa ta konsiente di e reglanan di tráfiko ku ta na vigor i pa kumpli ku esakinan. Tur hende ku ta partisipá na tráfiko mester karga su propio responsabilidat i tene kuenta ku otro. Huntu nos por sòru pa un tráfiko mas sigur na Boneiru pa tantu nos habitantenan komo nos bishitantenan.
