Kralendijk – Boneiru tin tres habitante pekuliar aserka. Desde korto Rambo, Ricky i Reggie ta na nos isla. Resientemente e tres chubatunan aki a yega ku KLM for di Hulanda.
E tres chubatunan for di Hulanda ta di rasa Boergoat i nan ta 3,5 luna bieu. Na luna di novèmber e chubatunan ta sufisiente grandi pa hasi uso di nan i e ora ei e programa di mehorashon di rasa por kuminsá.
Kada chubatu ta haña un propio stal kaminda por pone 10 kabritu tambe serka dje pa dèk. Kunukeronan por hiba nan mihó kabritunan muhé na Servisio di Agrikultura, Krio di Bestia i Peska (LVV). E kastamentu lo produsí bunita lamchi, ku por mata dentro di seis luna. E bentaha pa e kunukeronan ta ku por pidi un mihó preis pa karni di lamchi.
Esaki ta un proyekto di Profeshonalisashon di Krio di Kabritu den koperashon ku Servisio di Agrikultura, Krio di Bestia i Peska (LVV). E proyekto ke ofresé un futuro nobo na krio di kabritu. Investigadónan di Universidat di Wageningen a traha un plan di aserkamentu. E meta ta pa krea un situashon kaminda ámbos partido por saka bentaha pa medio di kombiná ekonomia i ekologia: fortifikashon di krio di kabritu i tur kabritu den kurá. Pa logra fortifikashon di krio di kabritu ta hasi esfuerso pa realisá renobashon di matadero, produkshon di kuminda pa bestia, mehorashon di rasa, produkshon di karni di lamchi, maneho di kabritu i siguridat.
Teksto pa serka potrèt: Diputado Kroon ta sostené e proyekto i a bin yama e chubatitunan bon biní.
