Selibon i Entidat Públiko Boneiru ta kuminsá dia 18 di mart 2026 ku kombatimentu di algun kandela bou di tera na lèntfel Lagun. E trabounan akí ta dura te ku djabièrnè 20 di mart 2026 i nan ta keda ehekutá den kolaborashon ku Selibon i e eksperto di lugá di depositá shushi ‘Afvalzorg’. Durante e siman tras di lomba, un biaha mas Afvalzorg a identifiká e sitionan kaminda tin kandela bou di tera i nan a formulá un plan di aserkamentu pa kombatimentu di e kandelanan akí.
Na lèntfel Lagun, den sinku sup-área, nan a identifiká vários sitio kaminda temperatura ta mas haltu. E sitionan akí por ta konektá ku otro, di manera ku kombatimentu por tuma vários dia. Pa e motibu akí nan ta skohe pa un aserkamentu dirigí i paso pa paso. Den esaki na promé lugá nan ta atendé ku e sitionan ku ta kousa mas tantu riesgo pa hende i medio ambiente.
Nan no ta verwagt ku ta bai tin molèster pa e bisindario. Nan ta ehersé e trabounan na un manera dominá i seif. Pa medio di koba e tereno na e sitio kaminda tin kandela bou di tera, paga e kandela i bolbe tapa e tereno, nan ta purba haña e fokonan di kandela bou di kontròl i evitá plamamentu mas aleu. Nan ta traha durante dia entre 08:00 or i 15:00 or. Di e manera akí tin sufisiente tempu pa limitá eventual molèster. Durante e trabounan henter ora tin un trùk di awa i material pa tapa presente.
Banda di e trabounan akí, Entidat Públiko Boneiru ta traha huntu ku Selibon i Afvalzorg riba un aserkamentu struktural di e kandelanan bou di tera. Pa medio di kontrolá e lèntfel regularmente, ora ku no tin kandela visibel tambe, por deskubri kualke foko di kandela na tempu i atendé ku esaki. Esaki ta yuda pa redusí riesgo pa e bisindario, pa medio ambiente i pa e empleadonan. Pa por vigilá e situashon bon, nan ta hasi uso di un ‘dashboard’ spesial di Afvalzorg. Ku e sistema akí kontinuamente nan ta monitoreá e fokonan di kandela i ta evaluá nan pa loke ta trata riesgo. A base di e informashon akí nan ta determiná na unda i kon nan ta bai aktua. Di e manera akí nan por traha mas rápidamente i mas efektivamente.
Entidat Públiko Boneiru ta komprondé ku e situashon akí por tin impakto riba e hendenan ku ta biba den serkania. Den kaso ku bo ta eksperensiá molèster, manera huma òf holó, e ora ei kariñosamente nos ta supliká bo pa tuma kontakto ku Entidat Públiko Boneiru via +599 777 2243.
