Kralendijk – For di 1 di yüni pasaheronan ku yega Bonaire International Airport, BIA, por laga hasi un test antigéniko. Esaki ta favorabel pa pasaheronan for di destinashonnan internashonal. Por ehèmpel pa pasaheronan for di Merka tabata difísil pa denter di e tempu stipulá hasi e tèst antigéniko. Hestia den kolaborashon ku Bon Lab ta hasi e tèst antigéniko den un kaya di tèst nobo na BIA. Espektativa ta ku lo por tèst 200 pasahero den mei ora.
Na yegada empleadonan di departamento di Salubridat Públiko ta risibí e pasaheronan. Nan ta kontrolá e deklarashon di salú i resultado di e tèst di PCR i nan ta wak si un pasahero mester hasi un tèst antigéniko. Si esei ta e kaso, e pasahero ta bai e kaya di tèst. Ta hasi e tèst den kònteinernan spesialmente ekipá pa esaki banda di imigrashon na aeropuerto.
Despues di hasi tèst e pasaheronan ta bai den e sala di espera. Un pasahero ku tèst positivo, obligatoriamente mester bai den isolashon na e adrès kaminda e ta hospedá. A base di e kehonan ku e pasahero tin, Salubridat Públiko ta determiná kuantu tempu e isolashon ta dura.
Djabièrnè 28 di mei Hestia a organisá tèstmentu di hende na Marriott hotel. Mènedjer Marco Padberg di Hestia a deklará ku e ensayo general a bai bon. For di 1 di yüni 2021 pasaheronan ku ta bin nos isla por download e ‘Bonaire Safety Travel app’. Ku e app akí biaheronan ku ta biaha pa Boneiru por registrá pa un tèst antigéniko promé ku nan salida pa nos isla. Hestia a desaroyá e app i for di 1 di yüni por download esaki riba www.bonairecrisis.com.
Hestia ta purba pa hasi mas tantu uso posibel di hende lokal na e kaya di tèst, asina Padberg a duna di konosé. E kompania ta traha huntu ku Plenchi di Trabou, e ofisina pa mediashon laboral di Entidat Públiko Boneiru i ministerio di Asuntunan Sosial i Bienestar. Tambe ta duna treinen pa personal di e kaya di tèst.
