Den e lunanan binidero entidat públiko Boneiru ta kuminsá ku drechamentu di Plenchi Brion. Esaki ta e tereno kaminda e prison bieu tabata ubiká, banda di pòstkantor di FXDC Post.
Diputado Hennyson Thielman, diputado James Kroon i diputado Jolinda Craane ta aspirá pa yega na mehorashon di vários área di rekreashon na nos isla. E inisiativanan akí ta basá riba e asina yamá ‘Centrumvisie’, o sea e vishon pa sentro di siudat. E diputadonan ta enfatisá ku ta importante pa hende di tur edat por disfrutá optimalmente di nos isla. I nan ta mustra ku sentro di Playa ta forma e kurason di Boneiru, pa motibu di su balor históriko i e forsa di atrakshon pa habitante i bishitante. Ta desaroyá e plenchi di e anterior Brion Kazèrne di tal manera ku te ainda bo por stashoná bo outo su tras.
E ta bira un plenchi sentral ku un podio pa hasi presentashon, un sitio kaminda mucha por hunga i sufisiente lugá pa sinta. E ta bira un bunita plenchi, kaminda grandi i chikí por gosa konhuntamente. Gobièrnu ta krea un plenchi yen di ambiente ku vegetashon, sombra i lugá pa sinta. Pa medio di hasi nos sentro di siudat mas bunita i mas atraktivo, nos ta stimulá su forsa di atrakshon i e ta haña mas bida i mas ambiente.
Dentro di poko e promé fase di e trabounan ta ranka sali. Esakinan ta prinsipalmente trabounan di preparashon, manera revisá i renobá e pipanan di awa, kontrolá e kloaka i prepará trabou di elektrisidat i otro fasilidatnan. Ta limpia e sitio di konstrukshon i ta pone hèkwèrk rònt di dje. Riba medionan sosial entidat públiko Boneiru lo duna informashon tokante e progreso i tokante e áreanan ku ta será temporalmente.
