Kralendijk – Fundashon Antriol Avanti a bestèl tapaboka spesial pa habitantenan di e bario ku djabièrnè binidero ta bai pasa nan promé angua na Plasa Chicu Goeloe. E fundashon a laga imprimí tapaboka ku e konosido lema Much’i Antriol. Habitantenan di bario ku riba djabièrnè 23 di aprel bin pasa nan promé angua di corona sin tin mester di traha sita, ta risibí e tapaboka ora nan ta kla.
,,Di e manera akí direktiva ke gradisí e habitantenan ku ta bin tuma e bakuna. Ora ku Boneiru ta salú, seif i felis, nos aki na Antriol tambe ta salú, seif i felis. E ora ei nos habitantenan di bario por sigui ku nan bida di ántes i nan por duna otro un brasa atrobe sin problema. Tambe nos por organisá nos eventonan den bario atrobe e ora ei,”asina e presidente Lupe Martis – Dortalina a deklará.
Último dianan direktiva di Antriol Avanti a drenta den bario pa informá habitantenan tokante e posibilidat pa pasa angua sin traha sita riba djabièrnè e siman aki i otro siman djabièrnè. Tambe nan a manda informashon via app pa e habitantenan. Sra Martis – Dortalina ta spera ku hopi hende ta bini djabièrnè. ,,Mi ta spera ku nos por parti hopi tapaboka.” For di 19 te ku 30 di aprel habitantenan di bario por pasa nan promé angua contra corona sin sita. E posibilidat pa pasa angua sin sita ta intenshoná tambe pa hende ku ta duda ainda si nan ta bai bakuná, òf ku tin nesesidat pa mas informashon ainda. Nan por bini sin traha sita i hasi nan preguntanan na e tim di pasa angua. Pa un bista general di e dianan ku habitantenan di bario por pasa angua den nan propio bario sin traha sita òf hasi nan preguntanan, wak riba www.bonairecrisis.com
