Dia 21 di febrüari próksimo ta Dia Internashonal di Idioma Materno. Pa tal rason gobièrnu di boneiru ta selebrá esaki djabièrnè awó. Den e kaso aki pa loke ta trata Boneiru, ta referí na nos idioma papiamentu. Papiamentu ta un idioma usá den tur gremio di nos komunidat i pa un gran mayoria di nos poblashon aki na Boneiru, sea nasé aki òf nò.
Papiamentu a sa di surpasá tur lucha i kolonialismo. Gobièrnu ta hasi uso di Papiamentu e idioma ofisial den korespondensia ku su pueblo. Ta komuniká na Papiamentu den gobièrnu pero tambe prensa i hasta den korte di hustisia ta hasi uso di nos dushi idioma Papiamentu. Nos mester ta hopi orguyoso di nos idioma materno i keda stimulá bon uso di Papiamentu.
E aña aki un biaha mas pa motibu di reglanan vigente relashoná ku COVID-19, SKAL huntu ku Fundashon Akademia Papiamentu ta selebrá Dia Internashonal di Idioma Materno na un manera adaptá.
Djabièrnè awó 18 di febrüari próksimo SKAL huntu ku Fundashon Akademia Papiamentu ta organisá un diktado eskolar entre skolnan básiko, esaki ta tuma lugá di 2’or pa 4’or di trai mèrdia. E mesun dia tambe lo tin un diktado pa públiko general di 7’or pa 9’or di anochi, esaki ta tuma lugá na Gran Chaparal situá na kaminda Sorobon.
Meta prinsipal di e diktadonan ta pa stimulá konsientisashon pa bon uso di Papiamentu segun ortografia ofisial. P’esei un invitashon na e pueblo di Boneiru pa partisipá na e diktado pa públiko general.
Ta bon pa menshoná ku tin diferente desaroyo positivo riba e tereno di idioma materno na Bonaire. Na e momentu aki partidonan tantu na Hulanda komo na Boneiru mes a inisiá un ruta pa rekonosementu di Papiamentu bou di e pakto Oropeo pa idioma regional òf idioma di minoria. E ta un lucha ku organisashonnan manera Akademia Papiamentu i Splika pa hopi tempu a hiba i awor ta mirando su resultado.
E aña aki tambe gobièrnu lo bin ku un maneho di idioma pa Boneiru. Ta haña importante pa nos pueblo por lesa den nan mes idioma. Un lugá ku sigur tin ku fasilitá den esaki ta nos biblioteka públiko Boneiru.
Gobièrnu di Boneiru pa medio di su diputado di kultura, sra. Nina den Heyer ta felisitá Boneiru ku su dia Internashonal di Dia Internashonal di idioma Materno.
