Entidat Públiko Boneiru ta anunsiá ku ta pèrmití kampamentu na sitionan públiko solamente entre 29 di mart i 8 di aprel 2026. Mester rùim òp tur sitio di kampamentu kompletamente pa 8 di aprel.
Registrashon ta obligatorio
Tur persona ku ta kampa mester registrá ònlain via REGISTRASHON KAMPAMENTU SEMANA SANTA 2026 – Fill out form òf na Selibon N.V. na Kaya Industria 20. Último dia pa registrá ta djabièrnè 27 di mart 2026. Sin registrashon no tin mag di kampa. Na momentu di registrashon un prueba bálido di identidat ta obligatorio i un persona di kontakto di e grupo di kampamentu tin ku firma e instrukshonnan.
Separá sushi ta obligatorio
E personanan ku ta kampa tin obligashon pa separá nan sushi den sinku kategoria:
Karbon
Plèstik
Glas
Bleki
Restu di sushi
Tur dia Selibon N.V. ta sòru pa rekohé tur sushi na e sitionan indiká. Stinapa i Selibon N.V. ta pone bakinan di sushi pa asina kampadonan por depositá sushi aden. Na final mester laga tur tereno di kampamentu limpi atras. Selibon NV ta fasilitá kampadonan ku 8 wc portatil: 2 na Sorobon, 2 na Lac, 2 na Donkey Beach i 2 na Te Amo Beach.
Regla pa konstrukshon temporal
Tin mag di pone konstrukshon temporal, tanten ku nan ta seif i ku nan no ta okashoná daño na naturalesa. Ta prohibí pa konstruí riba òf kontra konstrukshonnan eksistente riba bich.
Sitionan prohibí i sitionan pèrmití
Ta prohibí pa kampa na Klein Bonaire i den áreanan prohibí manera área di Ramsar Sorobon. Ta pèrmití pa kampa riba otro bichnan, tanten ku ta kumpli ku e reglanan.
Zonido i sosiego nokturno
Mester baha müzik entre 22:00 or i 06:00 or. Na Sorobon ta kompletamente prohibí pa toka müzik.
Reglanan di medio ambiente i komportashon
Semper hasi uso di un konfó òf grel – no ta pèrmití pa sende karbon direktamente riba santu.
No ta pèrmití pa snui òf kap mata.
No ta pèrmití kachó riba bich.
No ta pèrmití vehíkulo riba bich.
Den e periodo akí ta prohibí pa piska miéntras bo ta landa, pa piska gutu i pa kue karkó i kref.
Respetá turista i otro usuarionan di bich.
Mantenshon estrikto di lei
Un Taskforce spesial di entidat públiko Boneiru, Kuerpo Polisial Hulanda Karibense, SELIBON N.V., STINAPA, KMAR i MMHB (Multidisciplinaire Maritieme Hub Bonaire) ta kontrolá kumplimentu ku e reglanan. Den kaso di violashon por risibí un but òf nan por kita bo for di riba e tereno. Personanan ku ta kampa i ku no ta registrá ta kore e mesun riesgo.
Huntu pa un periodo di fiesta seif i limpi
Entidat públiko Boneiru ta hasi un yamada riba tur persona ku ta kampa pa kumpli ku e reglanan. Di e manera ei so nos por disfrutá huntu di un periodo di kampamentu trankil ku rèspèt, seif i bon pa medio ambiente.
