Hendenan ku un entrada for di 2.033 dòler i maksimalmente 3.817 dòler, tambe por pidi awor e kompensashon di 1.300 dòler pa kuenta di koriente. For di aña pasá hendenan ku un entrada mínimo por a pidi kaba e kompensashon di 1.300 dòler. Kolegio Ehekutivo a disidí ku for di awor no solamente hendenan ku entrada mínimo, sino tambe hendenan ku un entrada entre 2.033 – 3817 por pidi e kompensashon. Siudadanonan por pidi e kompensashon online na www.bonairegov.com, einan bai na ‘kampañanan’.
Ta duna e kompensashon ún biaha. Ta depositá e montante di 1.300 dòler riba e kuenta di WEB di e persona ku a hasi e petishon, òf ta duna esaki komo token na hendenan ku Pagabon. Ta posibel pa for di 6 di febrüari 2023 pidi e kompensashon durante oranan di konsulta na sentronan di bario. Fecha i orario di e oranan di konsulta ta riba www.bonairegov.com
A base di e kantidat di persona den un kas i haltura di e entrada(nan) mensual, ta determiná si un persona ta haña e supsidio. Pa haña e kompensashon, un hende ku ta biba su so sin yu, por tin un entrada di maksimalmente 2.033 dòler. Pa un persona ku ta biba su so ku un yu menor di edat, e máksimo na entrada ta 2.551 dòler. Un persona soltero ku 2 òf mas yu menor di edat por tin maksimalmente 3.069 dòler na entrada.
Ora dos persona adulto sin yu ta biba huntu den un kas, e entrada máksimo pa nan dos huntu ta 2.782 dòler. Ora dos persona adulto i un yu menor di edat ta biba huntu, e entrada máksimo pa nan dos huntu ta 3.299 dòler. Pa un kas ku dos hende adulto i dos òf mas mucha menor di edat, e entrada máksimo pa nan dos huntu ta 3.817 dòler. Pa kasnan ku mas ku dos hende adulto ku òf sin mucha menor di edat, e entrada máksimo huntu ta 3.817,-.
Ora ta pidi e kompensashon, mester entregá slep di salario di e último 3 lunanan, òf kopia di kuenta di banko di e último tres lunanan. Siudadanonan ku tin entrada di un kompania propio, mester entregá un prueba di inskripshon di Kámara di Komèrsio. I tambe kopia di kuenta di banko di e último tres lunanan.
Siudadanonan ku tin entrada ku kohementu di djòp, mester entregá kopia di kuenta di banko di e último tres lunanan. Personanan ku ta risibí penshun, hendenan ku ta haña AOV òf penshun di un kompania, mester entregá un karta ku nan ta risibí penshun /AOV. Nan mester entregá tambe kopia di kuenta di banko di e último tres lunanan. Personanan ku ta haña ònderstant, mester entregá un karta di SZW.
Pa pregunta tokante e supsidio di energia, siudadanonan por meil koriente@bonairegov.com òf yama/app e number 701 1055.
