Na LVV, e departamento di Agrikultura, Krio di Bestia i Peska, nan ta sumamente satisfecho tokante e dia habrí di 2 di aprel último. For di na entrada tabatin reinan largu di outo stashoná. Una bes ku nan a yega na e stèntnan e bishitantenan por a atmirá tur e flornan, matanan, bèrduranan i tera pa mata ku nan tabata bende. E bishitantenan tabata liber tambe pa hasi un bishita na e hòfinan i serka e bestianan di LVV. Masha hopi hende a hasi uso di e oportunidat akí.
E músika di Foyan Boys a sòru pa e dia habrí tabatin e ambiente boneriano di Simadan. E bishitantenan por a gosa di djus di fruta fresku i kuki biológiko, pero tambe di kos di boka dushi tradishonal manera tèrt. Tabatin vários tayer tambe. Einan e bishitantenan por a siña kultivá bèrdura i kon pa prepará esakinan na un manera distinto.
Maurice Adriaens, lider di proyekto di LVV, ta gradisí e bishitantenan i doñonan di stènt pa nan presensia i e dushi ambiente. Un danki spesial ta bai tambe pa Suyen Sussenbach ku su tim di Selibon, Maikel Kock i su tim, Lando Francisca di Rento Fun, Onnie Emerenciana i Selibon. Ku nan aporte nan tambe a sòru pa e dia habrí tabata un éksito.
Mirando e éksito di e dia habrí akí ya kaba na LVV nan ta papiando tokante un siguiente dia habrí. Probablemente esaki ta bai tuma lugá mas lat e aña akí.
